करिब ९ लाख रुपैयाँसहित ५ जना पक्राउ

विराटनगर / मोरङको केराबारी गाउँपालिकाबाट प्रहरीले ५ जुवाडेलाई पक्राउ गरेको छ । उनीहरु ८ लाख ८९ हजार २ सय ५० रुपैयाँसहित शनिबार पक्राउ परेको मोरङ प्रहरी प्रवक्ता नायब उपरीक्षक मानबहादुर राईले बताए ।
प्रनाउ राईका अनुसार पक्राउ पर्नेहरु विभिन्न सरकारी एवं गैर सरकारी संस्थाका कर्मचारीहरु, व्यवसायी तथा वैदेशिक रोजगारबाट फर्किएका रहेका छन् । प्रहरीका अनुसार पक्राउ पर्नेमा केराबारी–६ का ६० वर्षीय भुपेन्द्र भट्टराई, ४३ वर्षीय बोधराज मगर, सुनसरी धरान उपमहानगरपालिका–६ का ३६ वर्षीय हरि खत्री, उक्त महानगरपालिका–१५ का ३६ वर्षीय अरुण केसी र ३८ वर्षीय शैलेश भुजेल हुन् ।
उनले उनीहरुबाट १३ बुक तास, दुई स्कुटर र दुई मोटरसाइकल बरामद भएको बताए । स्थानीय भुपेन्द्र भट्टराईको घरमा जुवा खेलिरहेको गोप्य सूचनाको आधारमा प्रदेश १ प्रहरी कार्यालय तथा जिल्ला प्रहरी कार्यालय मोरङको संयुक्त टोलीले छापा मारी उनीहरुलाई जुवा खेलिरहेकै अवस्थामा पक्राउ गरिएको प्रनाउ राईले बताए ।