तमु प्ये ल्हु संघको १६औं वार्षिक साधारण सभा

चितवन / तमु प्ये ल्हु संघ जिल्ला समिति चितवनले १६औं वार्षिक साधारण सभा सम्पन्न गरेको छ । कोरोना भाइरस (कोभिड–१९) महामारीका कारण सीमित सदस्यहरुको उपस्थितिमा संघको १६औं वार्षिक साधारण सभा सम्पन्न गरिएको अध्यक्ष जगतबहादुर गुरुङले जानकारी दिए ।
कार्यक्रमका प्रमुख अतिथि पूर्व अध्यक्ष एवं सल्लाहकार संयोजक भीमबहादुर गुरुङले हामी गुरुङ समुदाय एकअर्काको सहयोगी हुनुपर्ने बताए । एकजुट भएमा हामी रहन्छौ, हामी रहे मात्र संघ रहने भएकाले सबैले हातेमालो गर्दै अघि बढ्नु पर्नेमा उनले आग्रह गरे ।
विभिन्न समयमा संघले गुरुङ समुदायभित्र रहेका साथीहरुलाई सहयोग गर्दै आइरहेको र भावी दिनमा संघले अझ बढी सहयोग गर्नेछ भन्नेमा आशावादी रहेको उनको भनाइ थियो ।
कार्यक्रममा विभिन्न समयमा सञ्चालन गरेका अभियानहरुलाई सहयोग गर्नेहरुलाई सम्मान गरिएको थियो । झण्डै साढे ३ वर्षसम्म निःशुल्क रुपमा संघको कार्यालय सञ्चालनको लागि कोठा उपलब्ध गराउनुहुने घरबेटी एवं महिला समितिका संयोजक इन्द्राकुमारी गुरुङ र टेक बहादुर गुरुङको दम्पतीलाई खादा लगाएर मायाको चिनो प्रदान गरी सम्मान गरिएको उनले जानकारी दिए ।
यस्तै संघका उपाध्यक्षहरु लालप्रसाद गुरुङ, शुकबहादुर गुरुङ, महिला समिति अध्यक्ष इन्द्राकुमारी गुरुङ, युवा समितिका अध्यक्ष राजिव गुरुङलगायत अतिथिहरुको सहभागिता रहेको थियो भने कार्यक्रम संघका सचिव विक्रम गुरुङले संचालन गरेका थिए ।