प्रधानमन्त्रीको अभिव्यक्तिप्रति नेपाली कांग्रेसको आपत्ति

काठमाडौं / प्रतिनिधिसभा विघटनका विपक्षमा बोल्नेहरू देशविरोधी भन्ने प्रधानमन्त्री केपी ओलीको अभिव्यक्तिप्रति नेपाली कांग्रेसले आपत्ति जनाएको छ ।
कांग्रेस प्रवक्ता विश्वाप्रकाश शर्माले विज्ञप्ति जारी गरी संविधानले प्रत्याभूत गरेको फरक मत राख्न पाउने अधिकारलाई प्रधानमन्त्रीले निषेध गरेको भन्दै आपत्ति प्रकट गरेका हुन् ।
प्रधानमन्त्रीको अभिव्यक्ति अलोकतान्त्रिक भएको कांग्रेसको ठहर छ । ‘कुनै पनि रंग र स्वरूपको अधिनायकवादविरुद्ध संघर्षमा उभिनु नै देशभक्तहरूको जिम्मेवारी, कर्तव्य र पहिचान हो’, विज्ञप्तिमा भनिएको छ ।
सर्वोच्च अदालतमा जारी बहसलाई तमासाको संज्ञा दिँदै प्रधानमन्त्रीले स्वतन्त्र विवेकलाई कुण्ठित गर्न खोजेको कांग्रेसको भनाइ छ ।
त्यस्तै, विज्ञप्तिमा प्रधानमन्त्रीले आलोचक पत्रकारलाई नर्क जान्छन् भन्नु प्रेस स्वतन्त्रताविरोधी अभिव्यक्ति भएको उल्लेख छ ।