चितवनको आँपटारीमा सुरु भयो देशकै पहिलो तौल पुल

–सुरक्षा न्यौपाने
भरतपुर । नारायणगढ मुग्लिन सडकखण्ड अन्तर्गत भरतपुर १ आंपटारीमा देशकै पहिलो तौल पुल सन्चालनमा आएको छ । भौतिक पूर्वाधार तथा यातायात मन्त्री बसन्त नेम्बाङले आइतबार उक्त तौल पुलको उद्घाटन गरेका हुन् ।
उद्घाटनमा बोल्दै मन्त्री नेम्वाङले नयाँ बाटोहरुलाई प्रविधिमैत्री बनाउनु पर्ने बताए । अन्य सडकहरुमा समेत तौल पुल बनाइने छ भने सडक संरक्षण र दुर्घना न्युनीकरणमा यसले सहायता पुग्ने उनको भनाइ थियो ।
वर्तमान सरकारले चितवनलाई विकासको मोडेल जिल्ला बनाउन लागि परेको र चितवनमा नै यातायात व्यवस्था कार्यालय निर्माण गर्न सरकार तयार रहेकाले प्रक्रिया जारी रहेको उनले बताए ।
उनका अनुसार आँपटारीको जग्गाको स्वामित्व लिने प्रक्रिया पूरा भए लगत्तै कार्यालय स्थापना हुनेछ । सवारीको भार मापन गर्ने कार्यलाई छिटै देशव्यापी बनाइने लक्ष्य रहेको उनले बताए ।
यातायात व्यवस्था विभागका महानिर्देशक गगनबहादुर हमालले बढी भार लिएर कुद्ने सवारीलाई नियमन गर्न तौल पुल आवश्यक भएको बताए । विभागका निर्देशक तथा इन्जिनियर रामचन्द्र पौडेलले आँपटारीमा बनाइएको तौल पुल सरकारीस्तरको देशकै पहिलो भएको भनाइ छ ।
सवारीको अत्यधिक भारका कारण सडकको पेभमेन्ट अपेक्षित अवधिभन्दा पहिले जीर्ण हुने समस्या रोकिने अपेक्षा गरिएको छ । धेरैजसो मालवाहक सवारी तोकिएको भन्दा बढी वजन बोकेर चलाउने गरेको पाइन्छ ।
सुरुको एक महिना तोकिएको तौलमा मालवाहक सवारी चलाउन सचेतना फैलाइने छ र पछि बढी वजन बोकेमा फिल्डमै कारवाही गरिने जनाइएको छ । यस्तैगरी बर्दिवासमा अर्को तौलपुल निर्माणाधिन अवस्थामा छ ।
कानुनत मालबाहक सवारी साधनले प्रति एक्सल १० दशमलव २ टनभन्दा बढी वजन लिएर चलाउन नपाउने व्यवस्था छ । ८० टन क्षमताको १८ मिटरको लामो तौल पुल बनाइएको छ । १ करोड २१ लाखमा बनेको हो ।