भुकम्पमा ४ जना घाइते, भत्किए एक दर्जन बढी घर

लमजुङ / लमजुङ मस्र्याङ्दी गाउँपालिका–३ भुलभुलेमा भूकम्पले घर भत्किँदा विभिन्न स्थानका चार जना घाइते भएका छन् ।
जिल्ला प्रहरी कार्यालय लमजुङका अनुसार घाइते हुनेहरुमा बेँसीशहर नगरपालिका–६ का वर्ष ३६ का उमा गुरुङ, वडा नं ११ चितीका वर्ष ८३ का खकाकुमारी पाण्डे, वडा नं ८ का वर्ष २९ का खुशीमाया गुरुङ र मस्र्याङ्दी गाउँपलिका–६ ठुलीबेँसीका वर्ष २२ का गोविन्द्र अधिकारी रहेका छन् । उनीहरुमध्ये खुशीमाया र गोविन्द भने भाग्ने क्रममा चोट लाग्न पुगी घाइते भएका हुन् ।
घाइतेहरुको जिल्ला अस्पताल लमजुङमा उपचार भइरहेको छ । उनीहरुको टाउको, हात खुट्टालगायतका शरीरमा चोट लागेको जिल्ला प्रहरी कार्यालय लमजुङका प्रहरी निरीक्षक जगदीश मिश्रले जानकारी दिए ।
भूकम्पले बेँसीशहर–१ का शम्शेर परियार, वडा नं ३ रानीकुवाका दीपक बराल, नवीन बराल, गोरे क्षेत्री, वडा नं ६ मकैडाँडाका लक्ष्मी अधिकारी, तुलबहादुर अधिकारी, टेकबहादुर अधिकारी, मस्र्याङ्दी–३ तरापुका बासुदेव खत्रीको घरमा क्षति पुगेको प्रहरी निरीक्षक मिश्रले बताए ।
त्यस्तै मध्यनेपाल नगरपालिका–७ का तीर्थराज घिमिरे, बेँसीशहर–६ कै धीरबहादुर रिमाल, बुद्धिबहादुर रिमालको घरमा क्षति पुगेको उनले बताए । अधिकांश घरहरु ढुंगामाटा र जस्तापाताको छानोबाट बनेको र थप विवरण आउन बाँकी रहेको प्रहरीको भनाइ छ ।
लमजुङसहित छिमेकी जिल्ला मनाङ, कास्की, गोरखालगायतका जिल्लामा समेत धक्का पुगेको बताइएको छ । जिल्लामा भने अझै पटकपटक भूकम्पको पराकम्पन जाने क्रम जारी रहेको छ । यसरी पटकपटक भूकम्पको धक्का गइरहेकाले यहाँका स्थानीयवासी घरबाहिर सडक र खुला ठाउँमा निस्किएर बसेका छन् ।
लमजुङ केन्द्रविन्दु बनाएर आज बिहान ५ः४५ बजे ५.८ म्याग्निच्यूटको भूकम्पको गएको थियो ।