टिपर चलाउनेलाई मस्ती, अटो चलाउनेलाई सास्ती

हेटौंडा / मकवानपुर प्रहरीले निषेधाज्ञाको समयमा चल्ने अटोका चालकलाई ठूलै अपराध गरेझैँ केरकार गर्छ । लाइसेन्स र बिलबुक माग्छ । तर, टिपरलाई भने प्रहरीले चेकजाँचको क्रममा केही माग्दैन । टिपर चालकले टिपर तीव्र गतिमा चलाइरहँदा पनि प्रहरी चुपचाप बस्छ । टिपरलाई कुनै रोकतोक छैन ।
निषेधाज्ञाको समयमा प्रमुख जिल्ला अधिकारीले बिहान ९ बजेसम्म बजारमा अत्यावश्यक सामान खरिदको समय निर्धारण गरेका छन् । प्रहरीले बिहान ९ बजेसम्म चल्ने सवारीसाधनलाई चारै नाकामा चेकजाँच गरेर निषेधाज्ञा कडा बनाएको बताउँछ । तर, बिहान ९ बजेपछि साँझसम्म प्रहरीले कहिँकतै चेकजाँच गर्दैन । नागरिकहरु निर्वाध बजारमा डुल्छन् । बजार भीडभाड देखिन्छ ।
सवारीसाधनको चाँप पनि दिनभर बढ्छ । अत्यावश्यक कामबाहेकका सवारीसाधन निर्वाध चल्छन् । चोकमा प्रहरी हुन्छ तर चेकजाँच हुँदैन । रोकतोक हुँदैन ।
मकवानपुर प्रहरी प्रमुख एसपी सोमेन्द्र सिं राठौर आफूलाई बजारमा सवारीसाधन निर्वाध चलेझैँ नलागेको बताउँछन् । बजारमा त्यस्तो छ र, खै मलाई त जानकारी भएन, एसपी राठौरले भने । उनले आफूले त्यसबारे बुझ्ने समेत बताए ।
बिहान ९ बजेपछि प्रहरीले सवारीसाधनहरु मनलाग्दी छाड्ने गरेको छ । ठूलालाई चैन, सानालाई ऐन भन्ने भनाइलाई प्रहरीले चरितार्थ गरिरहेको छ ।
ट्राफिक प्रहरी प्रमुख प्रहरी निरीक्षक प्रकाश पाँडेले टिपरलाई नरोक्नु भन्ने आदेश छ, त्यही भएर नरोकिएको बताए । जसरी अटो चालकलाई लाइसेन्स र बिलबुक माग्नु हुन्छ त्यस्तै टिपर चालकलाई माग्नु भएको देखिएन त भन्ने प्रश्नमा अहिले कोरोना संक्रमणका कारणले नियमित चेकजाँच नभएको उनले बताए । नियमित चेकजाँच छैन, त्यही भएर हो, उनले भने । -तु खबरबाट ।