३५ क्युफिट अवैध काठसहित दुई जना पक्राउ

हेटौंडा / मकवानपुरमा ३५ क्युफिट अवैध काठसहित दुई जना पक्राउ परेको छ । भीमफेदी गाउँपालिका वडा नम्वर २ भैंसेबाट उक्त काठसहित दुई जनालाई बिहीबार पक्राउ गरिएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार पक्राउ पर्नेहरुमा सिन्धुपाल्चोक जुगल गाउँपालिका वडा नम्वर २ बस्ने २८ वर्षीय सुमन लामा र सोही ठाउँ बस्ने २९ को सुवाष गोले रहेका छन् ।
हेटौंडाबाट भैंसेतर्फ जाँदै गरेका बा ९ च ५९१२ नं. को पिकअप गाडीलाई रोकी चेकजाँच गर्ने क्रममा लुकाई छिपाई ल्याएको उक्त परिणामको काठ बरामद भएपछि निजहरुलाई पक्राउ गरेको प्रवक्ता रिमालले बताए ।
उक्त काठ र गाडीसहित पक्राउ परेका उनीहरुमाथि आवश्यक अनुसन्धानका साथै कानूनी प्रकृया अगाडि बढाइएको प्रहरीले जनाएको छ ।