‘एमाले पार्टी होइन, ओली एण्ड कम्पनी हो’ : झाक्री

चितवन / नेकपा एकीकृत समाजवादी पार्टीकी केन्द्रीय सचिव रामकुमारी झाक्रीले एमाले पार्टी नभइ ओली एण्ड कम्पनी भएको टिप्पणी गरेकी छन् ।
सो पार्टीको रत्ननगर नगर कमिटी घोषणा कार्यक्रममा एमाले खड्कप्रसाद ओलीको निजी कम्पनी मात्र भएको बताइन् । उनले ओली प्रबृति विरुद्ध विद्रोह जारी राख्ने बताइन् । आफूहरुले सुरु गरेको समाजवादी यात्रा निकै कठिन रहेको भन्दै उनले एमालेबाट विद्रोह गरेर काँडाघारीको डरलाग्लो यात्रा सुरु गरेको बताइन् ।
‘हामीले सुरु गरेको समाजवादी यात्रा सजिलो छैन’ उनले भनिन्, ‘तर हामी संघर्ष र प्रयत्न गरेर सफल हुन्छौं ।’
ओली पात्रलाई सत्ताबाट हटाउन सफल भएको भन्दै उनले प्रबृति अझै कामय रहेकाले विद्रोह अनिवार्य सर्त भएको बताइन् । ओलीको दासत्व स्वीकार्न नसकेर पार्टीबाट विद्रोह गरेको नयाँ पार्टी स्थापना गरेको उनको भनाई छ । उनले एमालेको विधान महाधिवेशनलाई ओली राजाबाट महाराजा हुने मेला मात्र भएको बताइन् ।
उनले विधान महाधिवेशनमा पानीको बोत्तलमा फोटो सास्नेदेखि महङ्गा महङ्गा पोस्टर, होडिङबोर्ड छाप्ने पैसाको श्रोत खुलाउनु पर्ने बताइन् ।