चितवनको रामघाटमा एकै थप्पडमा ज्यान गएपछि …

चितवन / बूढापाकाहरुले भन्ने गर्छन् कसैलाई हात नहाल्नु, थाहा छैन कति खेर काल आएर बसेको हुन्छ । दैलोमा ठेस लागेर होस् वा झैंझगडा हुँदा एकैपटक हत्केलाको प्रहारले ज्यान गएको पनि समाचार बेलाबेलामा आउँछन् ।
यस्तै भरतपुर महानगरपालिका ४ रामघाटमा मदिरा सेवन गरेका एक व्यक्तिको एकै थप्पडका कारण मृत्यु भएको छ । सोही ठाउँका दिलीप श्रेष्ठले थप्पड हान्दा भुईमा लडेर उक्त व्यक्तिको मृत्यु भएको बिहीबार जिल्ला प्रहरी कार्यालय चितवनका प्रहरी प्रवक्ता सूर्यबहादुर थापाले जानकारी दिए ।
प्रवक्ता थापाका अनुसार मृत्यु हुनेमा भरतपुर महानगरपालिका ४ रामघाट, दुर्गाचोकका भीमबहादुर विक हुन् । विकले अत्यधिक सेवन गरी जथाभावी बोलेपछि श्रेष्ठले थप्पड हान्दा भुईमा लडेर उनको मृत्यु भएको प्रवक्ता थापाको भनाइ छ ।
विकको हस्पिटलमा उपचारको क्रममा मृत्यु भएको प्रहरीले बताए । श्रेष्ठलाई पक्राउ गरी थप अनुसन्धान भइरहेको प्रहरीले जनाएको छ ।