ब्लड क्यान्सर पीडित तामाङद्वारा उपचारको लागि अपिल

काभ्रे / ब्लड क्यान्सर पीडित रविन तामाङले उपचारको लागि अपिल गरेका छन् । काभ्रे जिल्ला तेमाल गाउँपालिका वडा नं. ९, मुक्पाटार स्थायी घर भएका २१ वर्षीय तामाङले आफ्नो उपचारका लागि सबैसँग अपिल गरेका हुन् ।
उनी विगत १ वर्षदेखि ब्लड क्यान्सरबाट पीडित भई पाटन अस्पतालमा उपचाररत छन् । अस्पतालको बेडबाटै रविनले देशविदेशमा रहेका नेपाली दाजुभाइ दिदीबहिनीहरुलाई आर्थिक सहयोगको लागि अनुरोध गरेका हुन् ।
भर्खर २१ वर्षको मात्र भएको र बाँचेर जीवनमा अझै केही गर्ने आफ्नो लक्ष्य रहेको बताउँदै उनले सहयोगको याचना गरेका हुन् । डाक्टरका अनुसार उनको बोनम्यारो ट्रान्सप्लान्ट गर्नुपर्ने भएको छ । सोको लागि नेपालमा सम्भव नभएकोले भारत नै जानुपर्ने भएको छ ।
१ वर्षसम्म उपचार गरेर सबै पैसा सकिएको उनको भनाइ छ । घरको आर्थिक अवस्था पहिला देखिनै जटिल भएको र हाल आर्थिक अभावका कारण उपचारमा समस्या आउन थालेको उनले भने ।
अस्पतालले उनको उपचारको लागि ८० लाख रुपैयाँ खर्च लाग्ने बताएको छ । उनको सहयोगको लागि बिरामीको बुवा प्रेम तामाङ मेघा बैंक नेपाल नेपाल लिमिटेड, खाता नं. ०९१००५८५५०७५९ भक्तपुर वा मो.नं. ९८१३५८२३८७ मा सम्पर्क गर्नुहुन अनुरोध गरिएको छ ।