पाल्पामा बस दुर्घटना हुँदा दुईको मृत्यु

पाल्पा / पाल्पामा भएको बस दुर्घटनामा दुई जनाको मृत्यु भएको छ । उक्त बस दुर्घटना शुक्रबार बेलुका भएको जिल्ला प्रहरी कार्यालय पाल्पाले जनाएको छ ।
मृत्यु हुनेमा रैनादेवी छहरा गाउँपालिका वडा नं. ६ का ४२ वर्षीय बेदबहादुर जिसी र सोही स्थानमा १० वर्षीय अशोक रास्कोटी रहेको प्रहरीले जनाएको छ ।
प्रहरीका अनुसार शुक्रबार बेलुका ५ बजेतिर रैनादेवी छहरा गाउँपालिकाको वडा नं. ६ स्थित पानीडाँडादेखि जुठापौवातर्फ जाँदै गरेको ग १ ख ४९०२ नं. को बस बसधनीले चलाएपछि चार सयमिटर तल खसेर दुर्घटना भएको हो ।
बसमा सवार अन्य ४ जना बालकहरु घाइते भएका छन् । घाइते हुनेमा ७ वर्षीय रोहीत घर्ती, ८ वर्षीय मिलन बगाले, ८ वर्षीय रोम घर्ती, र ९ वर्षीय खिमबहादुर घर्ती रहेका छन् ।
प्रहरी कार्यालय पाल्पाका सूचना अधिकारी बिरेन्द्र जिसीका अनुसार सबै घाइतेको तानसेनस्थित लुम्बिनी मेडिकल कलेज प्रभासमा उपचार भइरहेको छ ।
रातिको समय भएका कारण मृतकको पोष्टमार्टम हुन भने बाँकी रहेको प्रहरीले जनाएको छ । दुर्घटनाको कारण नखुलेको हुँदा थप अनुसन्धान जारी रहेको प्रहरीले जनाएको छ ।