भरतपुरहुँदै कालिका नगरपालिका जोड्ने सडकको मर्मत नहुँदा स्थानीयलाई सास्ती

चितवन / पाँच वर्ष बिताएर गएका जनप्रतिनिधिले सडक नबनाइदिँदा स्थानीयले सास्ती खेप्नु परेको छ । भोजाड हुदै लंकालाइन जाने जंगलबीचको सडकखण्ड ठाउँठाउँमा भत्किएको र खाल्डाखुल्डीले कन्तबिजोग छ ।
भरतपुर महानगरपालिका र कालिका नगरपालिका जोड्ने यो मुख्य सडक खण्डमा जनप्रतिनिधि कसैको ध्यान नपुग्दा स्थानीय समस्या छन् । जनताका भोट पाएर पदमा पुगेका जनप्रतिनिधिहरुले चासो नदिँदा वर्षायाममा सांघुरो र हिलाम्मे सडकमा दिनहु यात्रा गर्न बाध्य छन् ।
सडकका ठूला–ठूला खाल्डाले साइकलयात्री, पैदलयात्री सहित सबैलाई समस्या भएको स्थानीयले गुनासो गरेका छन् । यसअघि पाँच वर्ष बिताइ सकेका रेनु दाहाल पुनः महानगरको मेयरमा निर्वाचित भएकी छिन् भने कालिका नगरपालिकामा व्यक्ति फेरिए पनि उही पार्टी नेकपा एमालेका उम्मेदवार नै नगरप्रमुखमा निर्वाचित भएका छन् ।
तर वर्षेनी आँखै अगाडिको समस्या पनि नदेख्ने जनप्रतिनिधि रहेको भन्दै स्थानीयले आक्रोश पोखेका छन् । सडक साँघुरो सँगै ठुलठुला खाल्डाखुल्डी हुँदा दुर्घटनाको जोखिम समेत बढ्दै गएको उनीहरुको भनाइ छ । चांडै व्यवस्थित सडक बनाउन माग गर्दै खाल्डाखुल्डी पुरेर सडक कालोपत्र गरिदिन स्थानीयले आग्रह गरेका छन् ।