राप्तीका निवर्तमान उपमेयर लामाद्वारा अलपत्र दुईको अभिभावकत्व ग्रहण

चितवन / राप्ती नगरपालिकाका निवर्तमान उपमेयर एवम् नेकपा एमाले बागमती प्रदेश कमिटी सदस्य इमानसिंह लामाले श्रीमानको क्रुर यातनाबाट ज्यान गुमाउन पुगेकी खैरहनीकी गीता माझीको दुई छोरीहरुको अभिभावकत्व ग्रहण गरेका छन् ।
लामाले आमाको मृत्यु तथा बाबु हिरासतमा रहेका कारणले अलपत्र अवस्था पुग्न लागेका गीताका छोरीहरुलाई उनीहरुको घरमै पुगेर अभिभावकत्व ग्रहण गरेका हुन् ।
उनले गीताकी दुई कक्षामा अध्यनरत कान्छी छोरी सुस्मिता माझीलाई १२ कक्षासम्म पढाउने प्रतिबद्धता ब्यक्त गरेका छन् । अर्की माइली छोरी निशालाई पढ्ने उमेर ढल्किसकेकोले रोजगारमुलक जुनसुकै सीप सिक्न चाहेमा सहयोग गर्ने लामाले प्रतिबद्धता जनाएका छन् ।
लामाले अभिभावकविहीन अवस्थामा आफ्नो सानो सहयोगले कसैको अध्ययन निरन्तरता हुन्छ भने र कसैको चुल्हो जल्छ भने आफ्नो क्षमताले भ्याएसम्म सहयोग गर्न तयार रहेको बताए । कान्छी छोरी सुस्मिता आमाको किरियामा बसेकी छन् भने उनीहरुलाई भेट्न पुगेका लामाले स्थानीय जनप्रतिनिधिहरुसँगको समन्वयमा अभिभावकत्व ग्रहण गरेका हुन् ।
लामा यसअघि पनि विभिन्न सामाजिक कार्यहरुमा सक्रिय रहँदै आएका छन् । उनले राप्तीका उपमेयर हुँदा आफ्नो आम्दानीको सबै रकम आर्थिक रुपमा विपन्न चेपाङका ६ घर परिवारलाई घर निर्माण गरी हस्तान्तरण गरी दिएका हुन् । कोभिडका बेला दीर्घरोगी तथा अन्य अस्पताल जान नसक्ने विरामीहरुलाई आफैले गाडी चलाएर अस्पताल लैजाने र ल्याउने कार्य समेत गरेका हुन् ।
उनले आफू पदमा रहे पनि नरहे पनि सामाजिक काममा सक्रियता निरन्तर रहने बताए । सुस्मितालाई कक्षा १२ सम्म अध्ययन गर्नका लागि आवश्यक पर्ने सबै खर्च व्यहोर्ने उनले भने ।
गीताका श्रीमान् रामचन्द्रले मलद्वारबाट लठ्ठी घुसाउँदा गम्भीर घाइते भएकी उनको जेठ १६ गते निधन भएको थियो । आफ्नै श्रीमती कुट्ने ४० वर्षका रामचन्द्रलाई ज्यान मार्ने उद्योग र जवर्जस्ती करणी कसुरमा मुद्दा दर्ता गरी अनुसन्धान भइरहेको छ ।