नारायणगढ–मुग्लिन सडकखण्ड अवरुद्ध, पहिरो पन्छाउने कार्य जारी

चितवन / नारायणगढ–मुग्लिन सडकखण्ड दुईतर्फ अवरुद्ध भएको छ । ईच्छाकामना गाउँपालिका ४, पृथ्वी राजमार्गस्थित नाग्दी खोलामा माथिबाट सुख्खा पहिरो झरी बाटो दुई तर्फ अवरोध भएको जिल्ला प्रहरी कार्यालय चितवनले जनाएको छ ।
कार्यालयका अनुसार आज (आइतबार) दिउँसो करिब १२ः१० बजे सुख्खा पहिरो खसी बाटो अवरुद्ध भएको हो । उक्त स्थानमा इलाका प्रहरी कार्यालय मुग्लिनबाट प्रहरी निरीक्षकको टोलीसहित पहिरो पन्छाउने कार्य भइरहेको प्रहरी प्रवक्ता नरहरि अधिकारीले जानकारी दिए ।
पहिरो खसेको स्थान इलाका प्रहरी कार्यालय मुग्लिनबाट ३ किलोमिटर उत्तरतर्फ पर्ने बताइएको छ ।