स्थानीय तहका अधिकांश उम्मेदवारहरुको खर्च विवरणमा आनाकानी

पर्सा / पर्साका विभिन्न स्थानीय तहमा उम्मेदवार बनेका अधिकांश उम्मेदवारले हालसम्म पनि निर्वाचनमा भएको खर्च विवरण बुझाएका छैनन् ।
निर्वाचन कार्यतालिका अनुसार निर्वाचन सम्पन्न भएको ३५ दिनभित्र सबै उम्मेदवारले निर्वाचन खर्च पेश गर्नुपर्ने कानूनी प्रावधान छ ।
जिल्ला निर्वाचन कार्यालय पर्साका अनुसार पर्सामा गत स्थानीय चुनावमा ३ हजार ४५८ उम्मेदवार बनेकामध्ये १ दशमलव २७ प्रतिशत अर्थात् ४४ जनाले मात्र खर्च विवरण पेश गरेका छन् ।
जिल्लाका १४ पालिकामा स्थानीय निर्वाचनमा उम्मेदवार बनेका ३ हजार ४५८ मध्ये ४४ जनाले मात्र निर्वाचन खर्च पेश गरेका हुन् ।
नियमअनुसार तोकिएको समयभित्र चुनाव खर्च विवरण पेश नगर्दा हरेक उम्मेदवारलाई जनही ५ हजार रुपैयाँ जरिवाना हुनसक्ने नियम छ । पर्सामा वीरगञ्ज महानगरपालिका, ३ नगरपालिका र १० गाउँपालिका रहेका छन् । – लोकान्तरबाट