एक वर्षमा ३३ हजार बढी सवारीसाधन कारबाहीमा

चितवन / जिल्ला ट्राफिक प्रहरी कार्यालय चितवनले एक वर्षको अवधिमा ३३ हजार ७३८ सवारीसाधन कारवाहीमा परेको जनाएको छ ।
ट्राफिक कार्यालयका अनुसार गत आर्थिक वर्ष ०७८/०७९ मा ती सवारीसाधन वापत जरीवाना स्वरुप ३ करोड ८ लाख ५४ हजार पांँचसय राजश्व संकलन भएको छ ।
सडकमा गुड्ने ट्रक ट्रिपर, बस, माईक्रोबस, जीप कार, ट्याक्टर, मोटरसाइकल, टेम्पो तथा अन्य सवारी साधनबाट हुने कारवाहीबाट ट्राफिक कार्यालयले जरिवाना असुल्दै आएको छ ।
जिल्लामा सबैभन्दा बढी राजश्व संकलन मोटरसाइकल, ट्याक्टरबाट लिइएको छ भने बढी ट्राफिक कारवाही मोटरसाइकल पर्ने गरेको बताइएको छ ।
कार्यालयले एक वर्षमा ९ हजार २५१ वटा मोटरसाइकलबाट ७८ लाख ५४ हजार पांंँचसय रुपैयांँ राजश्व संकलन गरेको छ भने १ हजार ५७२ वटा ट्याक्टर कारवाहीबाट १५ लाख ६८ हजार पांँचसय संकलन गरेको छ ।
यसैगरी ६ हजार २३८ वटा ट्रक÷टिपर कारवाहीबाट ६८ लाख २४ हजार रुपैंया, ७ हजार ७२२ वटा जीप÷ कार कारवाहीबाट ७० लाख ९४ हजार पांँचसय,४ हजार ५७ वटा बस÷माइक्रो कारवाहीबाट ३७ लाख ८५ हजार र ४ हजार ८८८ वटा टेम्पो र अन्य सवारीसाधन कारवाहीबाट ३७ लाख २८ हजार रुपैंया संकलन भएको छ ।
कार्यालयका प्रमुख धर्मबहादुर अधिकारीले सवारीसाधनको संख्या बढेसंँगै ट्राफिक उल्लंघन घटनामा पनि बृद्धि हुने बताए । उनका अनुसार जिल्लाका सडकमा चल्ने सवारीसाधन मध्ये दुईचक्के सवारीसाधनको संख्या बढी भएको र उल्लंघनका घटना पनि सोही प्रकृतिका सवारीसाधनबाट भएकोले औसत रुपमा अन्य सवारीसाधन भन्दा मोटरसाइकलको कारवाही संख्या संँगै राजश्व पनि बढेको हो ।
ट्रयाक्टरको संख्या कम रहेको र बिशेषगरी ग्रामीण इलाकामा कृषि कर्म र ढुवानीमा प्रयोग हुने भएकोले कारवाहीसंँगै राजश्व कम भएको उनको भनाइ छ । ‘कतिपय जरिवाना गल्ती र सवारीसाधनको प्रकृति अनुसार पनि हुन्छ ।’ उनले भने ।