हरेक नागरिकलाई सूचनाको हकको प्रयोग गर्न मन्त्री खनालको आग्रह

चितवन / बागमती प्रदेशका आन्तरिक मामिला तथा कानुन मन्त्री कृष्णप्रसाद खनालले हरेक नागरिकले सरकारी कार्यालयबाट सूचनाको हक प्रयोग गरेर सूचना लिन अनुरोध गरेका छन् ।
मन्त्री खनालले भरतपुरमा बिहीबार आयोजित सूचनाको हक सम्बन्धी एकदिने अन्तरक्रिया कार्यक्रममा सम्बोधन गर्दै सूचना लिने दायित्व पत्रकारको मात्र नभइ हरेक नेपाली नागरिकको रहेको बताए ।
कार्यालयले गरेको काम कार्वाही र सेवाको विषयमा जानकारी लिने, गुनासो गर्ने, गुनासो सुन्ने निकाय रहेकाले निर्धक्क भएर सूचनाको प्रयोग गर्न उनले आग्रह गरे ।
जिल्ला प्रशासन कार्यालय चितवनका सहायक प्रमुख जिल्ला अधिकारी चिरन्जीवि शर्माले कार्यालयले सम्पादन गरेका कामको विषयमा सूचना पाउने अधिकारी नागरिकको रहेको बताए ।
बागमती प्रदेशका प्रेस रजिष्टार रेवती सापकोटाले भरपर्दो सूचना लिनु अनुरोध गरे । हतारमा सूचना लिँदा गलत सन्देश जाने भएकाले सूचना लिने र दिने दुबैले आवश्यक ध्यान दिनु पर्नेमा उनको जोड थियो ।
प्रदेश सूचना पुनरावेदन समिति बागमती प्रदेशका अध्यक्ष हरिप्रसाद अधिकारी, आन्तरिक मामिला तथा कानुन मन्त्रालयका कानुृन अधिकृत मदनप्रसाद शिवाकोटीले सूचनाको हक र प्रयोगको विषयमा जानकारी गराएका थिए ।
कार्यक्रममा प्रदेश मन्त्रालय अन्तर्गतका सरकारी कार्यालयका सूचना अधिकारी, बार एशोसियसनका जिल्ला अध्यक्ष रामकृष्ण अधिकारी, जिल्लाका पत्रकारसँग आवद्ध संघ सस्थाका प्रतिनिधिहरु, मानव अधिकारकर्मी लगायतको सहभागिता रहेको थियो ।