भोजाड पदमपुरको सडक खाल्डाखुल्डीले सास्ती, ग्राभेलले सहज बनाइयो

चितवन / दुर्घटनाको जोखिम र आवतजावतमा समस्या हुँदा समेत मर्मतमा ध्यान नदिएर भरतपुर महानगरले लाचारीपन देखाएपछि कालिका नगरपालिकाले भोजाड पदमपुर सडकको खाल्डाखुल्डी पुर्न थालेको छ ।
वर्षौंदेखि समस्याग्रस्त सडक मर्मत हुन्छ भन्दै आश्वासन दिएको महानगरले आफ्नो क्षेत्रमा पर्ने सो सडकखण्ड मर्मतसम्भारमा चासो नदिएको हो । तर महानगरले काम नगरेपछि कालिका नगरपालिकाले ग्राभेल लगेर सडक सहज बनाएको छ ।
महानगरको क्षेत्र भएपनि जनताले सास्ती खेप्नु परेपछि खाल्डाखुल्डी पुरेको कालिका नगरपालिकाका नगर प्रमुख बिनोद रेग्मीले जनाकारी दिए । यता भरतपुर महानगरपालिकाले भने प्रदेशबाट बजेट आउने र मर्मत हुने आश्वासन दिन अझै छाडेको छैन ।
महानगरका प्रमुख प्रशासकीय अधिकृत रामबन्धु सुबेदीले सडकको ठेक्का लागेको र चांडै काम सुरु हुने दाबी गरे । फागुन चैतमै ठेक्का लागेको भएपनि अझै काम भने सुरु भएको छैन । वर्षा सकिएपछि काम सुरु हुने उनले बताए ।