भीडभाडमा अवाञ्छित गतिविधि गर्ने ५९ जना पक्राउ

विराटनगर / विराटनगरमा निकालिएको धार्मिक एवं ऐतिहासिक राधाकृष्ण रथयात्राका क्रममा अत्यधिक भीडभाडको मौका छोपेर अवाञ्छित गतिविधि गर्ने ५९ जनालाई प्रहरीले नियन्त्रणमा लिएको छ ।
रथयात्रा जारी रहेका बेला अवाञ्छित एवं शंकास्पद गतिविधिमा संलग्नलाई पक्राउ गरेर अनुसन्धानको दायरामा ल्याइएको मोरङ प्रहरी प्रमुख एसपी शान्तिराज कोइरालाले जानकारी दिए । उनका अनुसार पक्राउ परेकाहरु सबै पुरुष हुन् । अधिकांश ३० वर्षसम्मको उमेर समूहका छन् ।
एसपी कोइरालाका अनुसार मादक पदार्थ सेवन गरेर होहल्ला एवं हुलहुज्जत गर्ने, झैझगडा र मोबाइल तथा सिक्री चोरीमा संलग्नलाई नियन्त्रणमा लिइएको हो। पक्राउ गरिएकामध्ये केहीको साथबाट चोरिएका सुनका सिक्री र मोबाइलसमेत फेला परेको उनले बताए। पक्राउ परेकामाथि अनुसन्धान भइरहेको प्रहरीले जनाएको छ ।
रथयात्राका क्रममा सिक्री चोरी भएको भनेर चारवटा उजुरी प्रहरीमा परेको छ । सातवटा मोबाइल चोरी भएको उजुरी पनि परेको छ। सामान चोरी हुनेको संख्या बढ्नसक्ने प्रहरीको अनुमान छ ।
विराटनगरमा शनिबार ५४ औँ संस्करणको राधाकृष्ण रथयात्रा निकालिएको थियो । तीनपैनीस्थित राधाकृष्ण मन्दिरबाट दिउँसो ३ बजे भव्य रथयात्रा निकालिएको हो। रथलाई विराटनगर परिक्रमा गराउँदै राति ८ः३० बजेतिर रथयात्रा समापन गरिएको थियो। प्रत्येक वर्ष श्रीकृष्ण जन्माष्टमीका भोलिपल्ट विराटनगरमा रथयात्रा निकाल्ने चलन छ ।
यसपटक परिवर्तित रुटसहित निस्किएको रथयात्राले विराटनगरको मेनरोडबाट रोडशेष, कोसी लोकमार्ग हुँदै मन्दिरसम्मको ९ किलोमिटर दूरी तय गरेको थियो। तीनपैनीबाट सुरु भएको रथयात्रालाई शंकरपुर मोड, गोल्छा चोक, जलजला चोक, ट्राफिक चोक, रोडशेष चोक, बसपार्क, महेन्द्र चोक, शनिमन्दिर र मुनालपथबाट बरगाछी हुँदै पुनः तीनपैनीस्थित राधाकृष्ण मन्दिरमा पु¥याएर विर्सजन गरिएको हो ।
राधाकृष्णको युगल जोडीलाई पैगोडा शैलीको २२ फिट लामो, १४ फिट चौडा र १८ फिट अग्लो रथमा राखेर नगर परिक्रमा गराइएको थियो । रथ तान्नका लागि रथको अगाडि दायाँ र बायाँ ५०–५० फिट लामो लट्ठाको व्यवस्था गरिएको थियो। २३ ठाउँमा विश्रामस्थलको प्रवन्ध गरेर रथयात्रा समापन गरिएको हो ।
नेपालसहित भारतबाट समेत रथयात्रामा सहभागी हुन भक्तजन आएका थिए। रथयात्रालाई सुरक्षित, मर्यादित र व्यवस्थित गर्न ठूलो संख्यामा सुरक्षाकर्मी परिचालन गरिएको थियो । (यो समाचार अन्नपूर्णपोष्टमा किशोर बुढाथोकीले लेखेका छन् ।)