प्रतिनिधि सभा चुनाव : गठबन्धनले सिट बाँडफाँट आज टुंग्याउने

काठमाडौं / पाँच दलीय सत्ता गठबन्धनले प्रतिनिधि सभाको सिट बाँडफाँट टुंग्याउने अन्तिम तयारी गरेको बताइएको छ ।
सिट बाँडफाँट टुंग्याउनका लागि आज (बुधबार) साँझ ५ बजे गठबन्धनका शीर्ष नेताहरूको बैठक बस्दैछ । शीर्ष नेताहरूको बैठक अगाडि नै दलहरूले आ–आफ्नो पार्टीमा छुट्टाछुट्टै छलफल गर्दै छन् ।
नेपाली कांग्रेसले शीर्ष नेताहरूको बैठक बिहान ९ बजेका लागि बालुवाटारमा बोलाएको छ । बैठकले कांग्रेसले कति सिट राख्ने भन्ने विषयमा पार्टीको एकीकृत धारणा तय गर्नेछ ।
सिट बाँडफाँटका लागि दलहरूले ११ सदस्यीय कार्यदल गठन गरेका थिए । नेपाली कांग्रेसका पूर्वमहामन्त्री कृष्णप्रसाद सिटौला संयोजक रहेको कार्यदलले सहमति जुटाउन नसकेपछि पुनः शीर्ष तहले नै निर्णय गर्न लागेको हो ।