केराबारीमा एकाबिहानै पुनः पहिरो, नामु सडकखण्ड अवरुद्ध

चितवन / नारायणगढ–मुग्लिन (नामु) सडक खण्ड पुनः अवरुद्ध भएको छ । बुधबार रातिदेखि परेको वर्षाका कारण उक्त सडकखण्ड अवरुद्ध बनेको हो ।
भरतपुर महानगरपालिका–२९ स्थित केराबारी नजिकको मौवा खोलामा आज बिहान ६ बजे पहिरो गएकोले सडकखण्ड अवरुद्ध भएको जिल्ला प्रहरी कार्यालय चितवनले जनाएको छ ।
चितवन प्रहरी प्रवक्ता नरहरि अधिकारीका अनुसार अहिले पहिरो हटाएर सडक खुलाउने प्रयास भैरहेको छ । यो समाचार तयार पारुन्जेलसम्म सडक सुचारु हुन अझै ५÷६ घण्टा लाग्ने प्रवक्ता अधिकारीले जानकारी दिए ।
उक्त केराबारीमा यसअघि पनि पटकपटक पहिरो गएको थियो । लामो दूरी भएर यात्रा गर्ने हजारौं यात्रुहरु पटकपटक अलपत्रमा परेका छन् । विशेषगरी वर्षाको समयमा नारायणगढ मुग्लिन सडकखण्डमा पहिरो जाने भएकोले यात्रुहरु सास्ती खेप्न बाध्य छन् ।