चितवन / नेपाली चलचित्र ‘पार्वती’को भरतपुरमा पत्रकार भेटघाट तथा प्रचारप्रसार कार्यक्रम सम्पन्न भएको छ । कार्यक्रममा निर्माण पक्षले चलचित्रको कथावस्तु, कलाकार र प्रदर्शन तयारीबारे सञ्चारकर्मीलाई मंगलबार जानकारी गराएको थियो ।
अभिनेत्री नीता ढुङ्गानाको लेखन तथा निर्देशनमा तयार भएको ‘पार्वती’ आगामी भदौ १२ गते शुक्रबारदेखि देशभरका सिनेमा हलमा प्रदर्शनमा आउने भएको छ । कार्यक्रममा चलचित्रले दिदी–भाइबीचको आत्मीय सम्बन्ध, पारिवारिक माया, संघर्ष र सामाजिक विषयलाई भावनात्मक रूपमा प्रस्तुत गरिएको अभिनेत्री ढुंगानाले बताइन् ।
- ADVERTISEMENT -
चलचित्रमा नीता ढुङ्गाना स्वयं मुख्य भूमिकामा छन् भने बाल कलाकार तथा गायक अशोक दर्जीले उनको भाइको भूमिका निर्वाह गरेका छन् । त्यस्तै, दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेललगायत कलाकारको अभिनय रहेको छ ।
‘पार्वती’को कथाको केन्द्रमा अटिजम भएकी दिदी र उनका भाइबीचको प्रेम, आत्मीयता र संघर्षलाई राखिएको छ । फरक विषयवस्तु र भावनात्मक प्रस्तुतिका कारण चलचित्रले दर्शकमाझ चासो बढाउँदै गएको निर्माण उनको दाबी छ ।
- ADVERTISEMENT -
चलचित्रले सबै उमेर समूहका दर्शकलाई लक्षित गरेको छ । चलचित्र केन्द्रीय जाँच समितिबाट ‘युनिभर्सल’ सर्टिफिकेट प्राप्त भएकाले परिवारका सबै सदस्यले एकसाथ बसेर हेर्न सक्ने निर्माण पक्षले जनाएको छ ।
उनले चलचित्रलाई माया र साथ दिन दर्शकलाई आग्रह गरिन् साथै, भदौ १२ गतेदेखि नजिकैको सिनेमा हलमा पुगेर ‘पार्वती’ हेर्न समेत दर्शकलाई अनुरोध गरेकी छन् ।
