रात्रिबस दुर्घटना : दुई जनाको मृत्यु, ३६ घाइते

हेटौंडा / मकवानपुरमा बस दुर्घटना हुँदा दुई जनाको मृत्यु भएको छ । दुर्घटना हेटौंडा उपमहानगरपालिका–१५ चुरीयामाइ मन्दिर नजिक भएको प्रहरीले जनाएको छ । उक्त दुर्घटनामा ३६ जना घाइते भएका छन् ।
प्रहरीका अनुसार काठमाडौंबाट झापाको दमक जाँदै गरेको ना७ख २०३२ नम्बरको रात्रि बस आइतबार राति पूर्व–पश्चिमराजमार्ग अन्तर्गत चुरीयामाई मन्दिर नजिक नालीमा खसेको हो ।
मृत्यु हुनेमा झापाको दमक–५ का ६० वर्षीय दिल्लीबहादुर दर्जी र मोरङ जिल्ला बेलबारी–८ काअन्दाजी ५१ वर्षीय कल्पना राजबंशीको मृत्यु भएको प्रहरी नायब उपरीक्षक टेकबहादुर कार्कीले जानकारी दिए ।
दुर्घटनामा घाइतेमध्ये ३० जना हेटौंडा अस्पतालमा उपचारपछि घर फर्किएका छन् । थप उपचारका लागि तीन जनालाई भरतपुर, २ जनालाई काठमाडौं पठाइएको छ भने एक जनाको हेटौंडामैं उपचार भैरहेको प्रहरीले जनाएको छ ।