मञ्जु असहाय संरक्षण केन्द्रलाई खाद्यन्न सहयोग प्राप्त

चितवन / भरतपुर ११ वाइपासस्थित मञ्जु असहाय संरक्षण केन्द्रलाई खाद्यन्न सहयोग प्राप्त भएको छ । संरक्षण केन्द्रलाई खाद्यान्न अभाव भएको जानकारी प्राप्त भएपछि आज (शनिबार) सहयोग गरिएको कोभिड १९ ग्रुप भरतपुर ७ का अध्यक्ष विक्रम गुरुङले जानकारी दिए ।
गु्रपले ६ बोरा चामल, दाल ५ केजी, १० पोका नुन, एक दर्जन नुहाउने साबुन, लुगाधुने साबुन, चाउचाउ, बिस्कुट, मरमसला, अण्डालगायतका खाद्यान्न सामग्री सहयोग गरेको हो । यसअघि पनि केन्द्रमा गुरुङले जन्मदिनको अवसर पारेर सहयोग गरेको थियो ।
उनले केन्द्रको अवस्था निकै दयनीय रहेकोले सहयोग गरिएको र आगामी दिनमा पनि सहयोग गर्ने प्रतिबद्धता जनाए । मानव सेवा र सामाजिक कार्यमा सबैले मन खोलेर सहयोग गर्न आग्रह समेत गरे ।
मञ्जु असहाय संरक्षण केन्द्रका अध्यक्ष मञ्जु खाँडले सामाजिक कार्यमा सबैको सहयोग आवश्यक रहेको बताए । विगत ८ वर्षदेखि संरक्षण केन्द्र संचालन गर्दै आएका मञ्जुले खाद्यान्न मात्र सहयोग प्राप्त हुँदा अन्य कार्यमा असहज भएको भनाइ थियो ।
उनका अनुसार केन्द्रमा आश्रित बालबालिकालाई शिक्षा र स्वास्थ्यका लागि नगद चाहिने हुँदा सञ्चालनमा कठिनाइ भएको जिकिर गरिन् । अन्य कुनै आयश्रोत नहुँदा स्थानीय तह र सम्बन्धित निकायले उनीहरुको शिक्षा र स्वास्थ्यमा जोड दिन उनले आग्रह गरिन् ।
२०७२ सालमा स्थापना भएको संरक्षण केन्द्रको हाल आफ्नै भवन भएपनि सञ्चालनमा निकै चुनौति व्यहोर्नु परेको उनले भनिन् । विभिन्न दाताहरुसँग सहयोग जुटाएर निर्माण गरिएको उक्त भवनको अझै पनि ऋण तिर्न बाँकी रहेको बताइन् ।
उनीहरुको पालनपोषण नै दाताहरुबाट नै जुट्दै आइरहेकोले सबै संघसंस्था तथा मनकारीहरुलाई सहयोग गरी दिनुहुन उनले आग्रह समेत गरिन् । हाल केन्द्रमा २२ जना बाबुनानीहरु आश्रित छन् ।