मत बदर कम गर्न ट्रिटनको नमूना मतदान

काठमाडौं / ट्रिटन इन्टरनेशनल कलेज काठमाडौंले नमूना मतदान सम्पन्न गरेको छ । मङ्सिर ४ गते हुनगइरहेको प्रतिनिधि सभा र प्रदेश सभा निर्वाचनमा मत बदरको संख्या घटाउने उद्देश्यले नमूना मतदान गरिएको हो ।
कार्यक्रममा उक्त कलेजमा अध्ययनरत कक्षा ११, १२ र स्नातक तहका विद्यार्थीहरुलाई मतदान गर्ने सही तरिका सिकाइएको थियो । कलेजका नमुना मतदान कार्यक्रम व्यवस्थापक कमानसिंह आरसीले मत बदर कम गर्ने उद्धेश्यले उक्त कार्यक्रम गरिएको बताए ।
व्यवस्थापक आरसीका अनुसार नमुना मतदानमा महिला, पुरुष, अशक्त र जेष्ठ नागरिकहरुका लागि छुट्टाछुट्टै लाइनमा राखी मतदान केन्द्र व्यवस्थापन गर्ने, मतदान अधिकृतको हस्ताक्षर रुजु गर्ने, गोप्य स्थानमा पुगी उम्मेदवारको चुनावचिह्नमा मत दिने लगायतका विषयहरु सिकाइएको हो ।
नमुना मतदानमा आगामी मंसिर ४ गते हुने निर्वाचनका सबै प्रक्रिया पूरा गरिएको नयाँ बानेश्वर प्रहरी बृत्तका डिएसपि निशान्त श्रीवास्तवले बताए । कार्यक्रमले मतदाता शिक्षा प्रभावकारी हुने, मतदानमा नागरिक सहभागिता बढ्ने तथा बदर मतको संख्या कम हुने उनको भनाई थियो ।