भरतपुर वडा नं–१ मा सडक मापदण्ड विषयक छलफल

नारायणगढ / भरतपुर वडा नं. १ मा टोल विकास समितिका अध्यक्ष तथा प्रतिनिधि, राजनीतिक दलका प्रतिनिधि, भरतपुर महानगरपालिकालगायत सरोकारवाला निकायबीच छलफल भएको छ । महानगरपालिकाको ३५ दिने सूचनाको विषयलाई लिएर आइतबार छलफल गरिएको हो ।
सडक डिभिजन कार्यालयले पुस ८ गतेदेखि पूर्व–पश्चिम राजमार्ग क्षेत्रको दायाँबायाँको भौतिक संरचनामा डोजर चलाएसँगै भरतपुरवासीलाई त्रसित बनाएको छ । सूचना म्याद सकिनै लाग्दा कतै व्यक्ति स्वयम्ले संरचना हटाउन थालेका छन् । महानगरपालिकाले जारी गरेको सूचनाको म्याद सोमबार सकिएको हो ।
भरतपुर महानगरपालिकाले बनाएको मापदण्डको विषयमा चर्को आवाज उठेको हुँदा अर्को सूचना ननिकालेसम्म नआत्तिन वडा अध्यक्ष महर्जनले वडावासीलाई आश्वासन दिएका छन् । ‘अव्यवस्थित बसोवास र सामाजिक संघसंस्था बसेको ठाउँको विषयमा समेत कुरा उठेको छ’, उनले भने, ‘त्यस विषयमा पनि थप छलफल भइरहेको छ ।’ तर, सडक डिभिजनले पुस ८ गतेदेखि गरेको काम भत्र्सनायोग्य रहेको अध्यक्ष महर्जनले बताए ।
महानगरपालिकाले पनि रेखाङ्कनको काम नसकिएको हुँदा सकिएपछि मात्रै भत्काउने कुरा भएको उनले बताए । महानगरपालिकाले सूचना निकालेपछि पहिलोपटक वडा नं–१ ले वडावासीसँग छलफल गरेको उनले दाबी गरे । तर, सडकको मापदण्डभित्र पर्ने संरचनामा वडा बाधक नबन्ने उनको भनाइ छ ।
‘हामी विकासविरोधी होइनौँ, तर विकासको नाउँमा जनताले दुःख पाउनु पनि राम्रो होइन भन्नेमात्रै हो’, उनले भने ।