नारायणी नदी किनारमा विश्वशान्तिको लागि महायज्ञ सुरु

चितवन / नारायणी नदी किनारमा एक महिने साङ्ग–बिराट्–श्रीगायत्री कोटिहोम ज्ञानमहायज्ञ बिहीबारदेखि संचालनमा आएको छ । शहरी विकास मन्त्री एवम् राष्ट्रिय प्रजातन्त्र पार्टीका वरिष्ठ उपाध्यक्ष विक्रम पाण्डेले साङ्ग–बिराट्–श्रीगायत्री कोटिहोम ज्ञानमहायज्ञको उद्घाटन गरेका हुन् ।
मन्त्री पाण्डेले उद्घाटनमा बोल्दै हिन्दुको लागि मात्र नभएर विश्वशान्तिको लागि महायज्ञ आयोजना भएको विश्वास व्यक्त गरेका छन् । उनले नेपाल ऋषिमुनिले तपस्या गरेको तपोभूमि भएकाले पूर्ववत रुपमा शान्ति चाहेको बताए ।
‘नेपाल ऋषिमुनिले तपस्या गरेको तपोभूमि हो । यो भूमि पूर्ववत रुपमा शान्ति होस् । सुव्यवस्थित होस्’ उनले भने, ’दानवहरुको पञ्जाबाट मुक्त होस् भन्ने मैले भगवानसँग पुकार गरेको छु ।’
श्रीसनातन संस्कृति संरक्षण अभियान र श्रीगण्डकी–नारायणी संरक्षण महाआरती परिषद्को संयुक्त आयोजनामा महायज्ञ सुरु भएको हो ।
महायज्ञका प्रमुख वाचक परशुराम पाण्डेयले नारायणी किनारमा हुँदै आएको आरतीलाई निरन्तरता दिन महायज्ञ आयोजना गरिएको बताए । फागुन १२ गते सकिने महायज्ञमा १०८ ब्राह्मणहरुले गायत्री मन्त्रद्धारा हवन गर्ने उनको भनाइ छ । महायज्ञका वरिष्ठ सल्लाहकार टंकनाथ पौडेलले नेपालमा २०५७ सालपछि कोटिहोम यज्ञ हुन लागेको बताए ।
त्यस्तै नेपाललाई हिन्दुराष्ट्र घोषणा गर्न जनमत संग्रह गर्नुपर्ने धारणा राखे । हिन्दु राष्ट्रको लागि पिठाधिसले नै आन्दोलनको नेतृत्व लिनुपर्ने उनको तर्क थियो । महायज्ञमा कोटिहोम यज्ञ पनि बिहीबार साँझबाट नै सुरु भएको छ । महायज्ञको उद्घाटनअघि विभिन्न टोलि विकास संस्था र आमा समूहले कलश यात्रा निकालेका थिए ।
महायज्ञ सम्पन्न गर्न साढे दुई करोड रुपैयाँ खर्च हुने अनुमान गरिएको महायज्ञ संयोजक एवम् श्रीगण्डकी–नारायणी संरक्षण महाआरती परिषद्का अध्यक्ष प्रेमनिधि कँडेल (भारद्धाज)ले बताए । यज्ञ गर्न दैनिक करिब सात क्विन्टल चरु आवश्यक पर्ने उनको भनाइ छ ।