बाघको आक्रमणबाट जुधेर बाँच्न सफल भइन मैती बयलकोटी

हेटौंडा / बाघको आक्रमणबाट बुधबार एक जना महिला घाइते भएकी छन् । बाघको आक्रमणबाट हेटौंडा उपमहानगरपालिका वडा नम्वर १८ हर्नामाडीस्थित मानेडाँडा बस्ने अन्दाजी ५६ वर्षिया मैती बयलकोटी घाइते भएकी जिल्ला प्रहरी कार्यालय मकवानपुरले जनाएको छ ।
मकवानपुरका प्रहरी नायव उपरीक्षक टेकबहादुर कार्कीका अनुसार बुधबार अपरान्ह ४ बजे घाँस काट्न जाँदै गर्दा सुकौरा जाने बाटोमा बाघले बयलकोटीलाई आक्रमण गरेको हो । बाघले आक्रमण गरेपछि बयलकोटीले आफूसँग भएको घाँस काट्ने हसियाँले प्रतिकार गरेकी थिइन । बाघको आक्रमणबाट गाला, ओठ र ढाडमा चोट लागेको उनलाई उपचारको लागि हेटौंडा अस्पताल लगिएकोे प्रहरी नायव उपरीक्षक कार्कीले बताए ।
आक्रमण गर्ने बाघ जंगलतर्फ गएको बताइएको छ । वन कार्यालयबाट घटनाबारे थप बुझ्न त्यसतर्फ गएको प्रहरी नायव उपरीक्षक कार्कीले बताए । केही समयदेखि गाउँमा बाघले पशुचौपाया मार्ने र मानिसलाई समेत आक्रमण गर्न थालेपछि स्थानीयवासी त्रसित छन् । बाघ नियन्त्रण गर्न बारम्बार आग्रह गर्दा पनि प्रशासन मौन बसेको स्थानीयले बताए ।