उपनिर्वाचन सकियो, मतदाताको उत्साहमा कमी

चितवन / प्रतिनिधि सभा सदस्य उपनिर्वाचन अन्तर्गत तीन वटै क्षेत्रमा मतदान सकिएको छ । जसअन्तर्गत चितवन–२ मा ५९ प्रतिशत, तनहु“–१ मा ४८ प्रतिशत र बारामा ४५ मत खसेको हो ।
निर्वाचन अधिकृतको कार्यालयका अनुसार मतदान केन्द्रबाट प्राप्त प्रारम्भिक सूचना अनुसार चितवनमा ५९ प्रतिशत मतदान भएको हो । यो मतदान अघिल्लो निर्वाचन भन्दा कम हो । चितवन–२ मा गठबन्धनका साझा उमेदवार कांग्रेसबाट जीतनारायण श्रेष्ठ, एमालेबाट रामप्रसाद न्यौपाने र राष्ट्रिय स्वतन्त्र पार्टीबाट रवि लामिछाने प्रतिस्पर्धामा देखिएका छन् ।
यस्तै तनहुँ–१ मा जिल्ला निर्वाचनका कार्यालयका प्रमुख हरिप्रसाद ढकालका अनुसार ४८ प्रतिशत मत खसेको छ । उक्त क्षेत्रमा ६९ मतदानस्थलमा एक सय ५२ मतदान केन्द्र रहेका छन् ।
उपनिर्वाचनमा कांग्रेसका तर्फबाट गोबिन्द भट्टराई, एमालेका सर्वेन्द्र खनाल, रास्वपाका स्वर्णिम वाग्लेसहित ९ दलका प्रतिनिधि प्रतिस्पर्धामा छन् । तनहुँ–१ मा एक लाख २३ हजार तीन सय पाँच मतदाता रहेका छन् ।
यस्तै बारा–२ मा ४५ प्रतिशत मत खसेको मुख्य निर्वाचन अधिकृतको कार्यालय जनाएको छ । बारा–२ मा महागढीमाई र पचरौता नगरपालिकासहित ५ वटा स्थानीय तहका ४४ वटा वडाहरु छन् ।
जसमा ८२ मतदानस्थल, १३७ मतदान केन्द्र र एक लाख ५ हजार २५८ मतदाता रहेका छन् ।