विपन्नको स्वास्थ्य बिमामा वडाध्यक्षको भत्ता लगानी

मुग्लिन / इच्छाकामना गाउँपालिका–४ का वडाध्यक्ष रुद्रप्रसाद उप्रेतीले आफूले पाउने भत्ता रकम विपन्न परिवारको बिमा वापतमा खर्च गरेका छन् । वडाध्यक्षलाई उपलब्ध गराइएको मोटरसाइकल र पेट्रोल खर्चसमेत विपन्नमा परिवारमा उनले खर्चेका हुन् ।
“कार्यभार सम्हालेको दिन नै मासिक भत्ताको सुविधा नलिने घोषणा गरेको हुँ, उनले भने, आफ्नै सवारी प्रयोग गर्छु र तेल खर्च पनि लिएको छैन ।”
वडा नम्बर ४ ले वृद्धभत्ता पनि घर–घरमै पुगेर वितरण गर्दै आएको छ । “हामीले घर–घरमा पुगेर वृद्धभत्ता वितरण गरेका छौँ, उनले भने, ‘ग्लोबल आइएमई बैंकले टोलटोलमा कर्मचारी खटाएर वृद्धभत्ता वितरण गर्न सहयोग गरेको छ ।”
लामो समयदेखि सामाजिक कार्यमा सक्रिय रहँदै आउनु भएका उनले असहाय रोगीको उपचारका लागि आर्थिक सहयोग गर्दै आएका छन् । शिक्षा, खेलकुदलगायतका क्षेत्रमा पनि सहयोग गर्दै आएको र आगामी दिनमा पनि निरन्तरता दिने उनको भनाइ छ ।