‘प्रचारप्रसारमा पत्रकारहरुको भूमिका नेतृत्वदायी हुने’

चितवन । नेपाल कम्युनिष्ट पार्टी (एकीकृत समाजवादी) जिल्ला समन्वय समिति चितवनका अध्यक्ष अरुण पीडित भण्डारीले पत्रकारहरुसँगै समन्वय गरेर अघि बढ्ने बताएका छन् । नेकपा (समाजवादी) चितवनको भर्खर मात्रै अध्यक्ष पदभार सम्हालेका भण्डारीले समाजवादी प्रेस संगठन जिल्ला शाखाको आइतबार सम्पन्न विशेष बैठकमा सो बताएका हुन् ।
सो अवसरमा उनले समाजवादी प्रेस संगठन कार्यालय स्थापनाका लागि सहयोग गर्ने प्रतिबद्धता जनाएका छन् । कार्यालय स्थापनाको लागि आफूले विशेष पहल गर्ने र निकट भविष्यमा नै संचालनमा ल्याइने उनले बताए ।
हालको परिस्थिति जटिल छ यद्यपि निरुत्साहित नहुन उनले आग्रह समेत गरे । आगामी दिनमा प्रचार प्रसारका लागि पत्रकार साथीहरुकै नेतृत्वदायी भूमिका रहने उनको भनाइ थियो ।
यसैबीच समाजवादी प्रेस संगठनका केन्द्रीय सदस्य हरि अधिकारीले आगामी जेठ २६ र २७ गते हुने पहिलो राष्ट्रिय अधिवेशनका लागि जिल्लाबाट तीन जनालाई सहभागी गराउने जानकारी दिए । यद्यपी केन्द्रको परिपत्र जारी हुन भने बाँकी नै छ ।
बैठकमा समाजवादी प्रेस संगठन चितवनका अध्यक्ष टिकादत्त तिमिल्सिनाले संगठनलाई सुचारु ढंगले अघि बढाउन कार्यालय स्थापना गर्नुपर्नेमा जोड दिए । कार्यालय नहुँदा प्रचार प्रसारमा असहज भएको अध्यक्ष तिमिल्सिनाको भनाइ थियो । उनले निकट भविष्यमै पत्रकार लक्षित कार्यक्रम गर्नुपर्ने टड्कारो आवश्यक रहेको बताए ।
यस्तै संगठनका सहसचिव सरस्वती तामाङले पार्टीले पत्रकारलाई समेटेर अघि बढ्नु पर्ने सुझाव दिए । पार्टीको हरेक गतिविधिमा पत्रकारहरुको बाक्लो उपस्थिति हुनुपर्ने उनको जिकिर थियो ।
कार्यक्रममा सचिव रामु आचार्य, सदस्य विशाल आले लगायतले आ–आफ्नो भनाइ राखेका राखेका थिए ।