भरतपुर नगर तामाङ समाजको अधिवेशन भोलि, दुई जना सम्मानित हुँदै

–बबिलाल तामाङ
चितवन । चितवन जिल्लाकै सबैभन्दा बढी घरधुरी आवद्ध भएको भरतपुर नगर तामाङ समाजले बाह्रौं साधारण सभा तथा चौथों अधिवेशन गर्ने भएको छ । भोलि शनिबार (जेठ १६) हुने बाह्रौं साधारण सभा तथा चौथों अधिवेशनको सम्पूर्ण तयारी अन्तिम चरणमा पुगेको समाजका अध्यक्ष पासाङ तामाङले जानकारी दिए ।
अध्यक्ष तामाङका अनुसार बाह्रौं साधारण सभा तथा चौथों अधिवेशनमा दुई जना व्यक्तित्वहरुलाई सम्मान गर्ने भएको छ । सम्मानित हुने व्यक्तित्वहरु संस्थाका संस्थापक अध्यक्ष दिलमाया लामा र निवर्तमान अध्यक्ष गंगालाल लामा रहेका छन् । संस्थाको स्थापनाकालदेखि नै महत्वपूर्ण योगदान प्रदान गर्नु भएकोले उच्च मूल्याकंनसहित लामाद्वयलाई सम्मान गर्न लागेको उनले बताइन् ।
अधिवेशनमा नयाँ कार्यसमिति चयन गर्ने, संस्थागत प्रगति प्रतिवेदन, आर्थिक प्रतिवेदन पेश गर्ने लगायतको कार्यक्रम रहेको छ । अधिवेशन भरतपुर ११, भोजडास्थित छेच्यु थर्पलिङ गुम्बामा हुने अध्यक्ष तामाङले बताइन् ।
समाजमा वडा नं. २,३,१०,११ र १२ गरी २३५ घरधुरी तामाङ समुदाय छन् । पाँच वटा वडाका घरधुरी आवद्ध यो संस्था चितवनकै ठूलो भएको उनले बताइन् । तामाङ समुदायको हकहित, धर्म, संस्कृति, भाषा, रितिरिवाज जगेर्ना गर्ने उद्देश्यले यो संस्थाको उदय भएको हो ।
भरतपुर नगर तामाङ समाज वि.सं. २०६७ सालमा स्थापना भएको हो । समाजले वर्षेनी छेच्यु थर्पलिङ गुम्बामा तामाङ समुदायको सबैभन्दा ठूलो पर्व सोनाम ल्होछार वृहत रुपमा मनाउँदै आएको छ ।