काठमाडौं / नेपाल प्रहरीले अवैध लागूऔषधसहित विभिन्न स्थानबाट १० जनालाई पक्राउ गरेको छ । प्रहरीले पर्सा, डडेल्धुरा, झापा र मोरङ जिल्लाको विभिन्न स्थानबाट लागूऔषधसहित १० जनालाई पक्राउ गरेको हो ।
प्रहरीले पर्साको वीरगंज महानगरपालिका–१८, ईनर्वा मनियारी बस्ने ३० वर्षीय अजित कुमार सिंहलाई अवैध लागूऔषध गाँजा २ किलोसहित शुक्रबार दिउँसो पक्राउ गरेको छ । वडा प्रहरी कार्यालय श्रीपुरबाट खटिएको प्रहरीले उनको घर तलासी गर्दा उक्त गाँजा फेला पारी पक्राउ गरेको हो ।
यसैगरी पर्साको वीरगंज महानगरपालिका–१६, रजत जयन्ती चोकबाट अवैध लागूऔषध खैरो हेरोइन ५ सय मिलिग्रामसहित शनिबार बिहान एक जनालाई पक्राउ गरेको छ । प्रहरीले सोही नगरपालिका नगवा चोक बस्ने २० वर्षीय सुजन यादवलाई पक्राउ गरेको हो । प्रहरी चौकी ईनर्वाबाट खटिएको प्रहरीले भारतको रक्सौलबाट वीरगंजतर्फ पैदल आउँदै गरेको उनलाई उक्त पदार्थसहित पक्राउ गरेको हो ।
यस्तै, डडेल्धुराको अमरगढी नगरपालिका–४, तल्लो खलंगाबाट अवैध लागूऔषध चरेश ४ सय ९५ मिलिग्रामसहित शुक्रबार दिउँसो प्रहरीले एक जनालाई पक्राउ गरेको छ । प्रहरीले सोही ठाउँ बस्ने ४३ वर्षीय कमल गुरूङलाई पक्राउ गरेको हो । जिल्ला प्रहरी कार्यालय डडेल्धुरा र प्रहरी चौकी बागबजारबाट खटिएको प्रहरीले से।७ प ३६१५ नम्बरको मोटरसाइकललाई जाँच गर्दा चालक गुरूङलाई उक्त लागूऔषधसहित पक्राउ गरेको हो ।
उता झापाको कन्काई नगरपालिका–३, डाईमन टोलबाट अवैध लागूऔषध ब्राउनसुगर २ ग्राम १ सय २० मिलिग्राम र अवैध लागूऔषध गाँजा ४ ग्राम १ सय ७० मिलिग्रामसहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा सोही नगरपालिका–४ बस्ने २१ वर्षीय सन्जय चौधरी र ३० वर्षीय रोशन चौधरी रहेका छन् । इलाका प्रहरी कार्यलय सुरुङगाबाट खटिएको प्रहरीले सन्जयको साथबाट ब्राउनसुगर र रोशनको साथबाट उक्त गाँजा फेला पारी पक्राउ गरेको हो ।
यसैगरी, झापाको भद्रपुर नगरपालिका–५ मेचिपुलबाट अवैध लागूऔषध ब्राउनसुगर १ ग्राम ६ सय २० मिलिग्रामसहित २ जनालाई शुक्रबार साँझ प्रहरीले पक्राउ गरेको छ । पक्राउ पर्नेहरूमा हल्दीबारी गाउँपालिका–२ बस्ने २४ वर्षीय कमल बिक र २० वर्षीय प्रतिक तामाङ रहेका छन् । प्रहरी बिट मेचिपुलबाट खटिएको प्रहरीले भारतबाट नेपालतर्फ आउँदै गरेका मे ३ प ७८११ नम्बरको मोटरसाइकललाई जाँच गर्ने क्रममा मोटरसाइकलमा सवार उनीहरूलाई उक्त लागूऔषधसहित पक्राउ गरेको हो ।
यसैगरी झापाको मेचिनगर नगरपालिका–६ मेचिपुलबाट अवैध लागूऔषध खैरो हेरोइन २ ग्राम ५ सय मिलिग्रामसहित भोजपुर ट्याम्केमैयुम गाउँपालिका–७ बस्ने २९ वर्षीय उगेन दर्जीलाई शुक्रबार साँझ प्रहरीले पक्राउ गरेको छ । लागूऔषध नियन्त्रण व्यूरो काँकरभिट्टा र इलाका प्रहरी कार्यालय काँकरभिट्टाबाट खटिएको प्रहरीले भारतबाट नेपालतर्फ पैदल आउँदै गरेका उनलाई उक्त पदार्थसहित पक्राउ गरेको हो ।
उता, मोरङको सुन्दरहरैचा नगरपालिका–७ पाथिभरा टोलबाट अवैध लागूऔषध ब्राउनसुगर करिब २ ग्राम ५१ मिलिग्रामसहित २ जनालई शुक्रबार बेलुकी प्रहरीले पक्रउ गरेको छ । पक्राउ पर्नेहरूमा सुनसरी ईटहरी उपमहानगरपालिका–५ बस्ने २५ वर्षीय जीबन लिम्बु र २६ वर्षीय सुमन लिम्बु रहेका छन् ।
सुन्दरहरैचा नगरपालिका–७ पाथिभरा बस्ने कमला वानेमको घरमा लागूऔषध बेचबिखन भइरहेको भन्ने सूचनाको आधारमा इलाका प्रहरी कार्यालय बेलबारीबाट र प्रहरी चौकी गछियाबाट खटिएको प्रहरीले कमलाको घर तलासी गर्दा उनको घरमा पाहुना आएका दुवै जनालाई उक्त लागूऔषधसहित फेला पारी पक्राउ गेको हो ।
ती सबै घटनाको बारेमा प्रहरीले आवश्यक अनुसन्धान गरिरहेको छ ।
