– बबिलाल तामाङ
चितवन । नेपाल प्रहरी र स्थानीय जनतासँगको साझेदारितामा स्थापना भएको सामुदायिक सेवा केन्द्र नारायणगढले नयाँ वर्ष २०८१ को अवसर पारेर सोमबार भित्तेपात्रो विमोचन गरेको छ । उक्त अवसरमा केन्द्रले नव वर्षको शुभकामना आदान प्रदान तथा सम्मान कार्यक्रम समेत गरेको हो ।
बागमती प्रदेश सभा सदस्य तथा कार्यक्रमका प्रमुख अतिथि माया श्रेष्ठले भित्ते पात्रो वाचन गरेर विमोचन गरेकी हुन् । प्रमुख अतिथि श्रेष्ठले प्रदेशबाट आवश्यक पर्ने सहयोगका लागि पहल गर्ने प्रतिबद्धता जनाइन् ।
- ADVERTISEMENT -
सामुदायिक सेवा केन्द्र नारायणगढकी अध्यक्ष मिना खरेलले संस्थाको बारेमा प्रकाश पारेकी थिइन् । अध्यक्ष खरेलले सेवा केन्द्रमा अधिकृतस्तरको प्रहरी नभएकोले कामकारवाहीमा कठिनाइ भएको बताइन् ।
सो अवसरमा जिल्ला प्रहरी कार्यालय चितवनका प्रवक्ता (डिएसपी) श्रीराम भण्डारीलाई राष्ट्रप्रति पु¥याएको योगदानको उच्च मूल्याङ्कन गर्दै सम्मान गरिएको थियो । प्रवक्ता भण्डारी चार महिना अघि मात्र चितवन सरुवा भई आएका हुन् ।
भित्तेपात्रोमा सहयोग पु¥याउने व्यक्तित्वहरुलाई सम्मान स्वरुप मायाको चिनो प्रदान गरिएको थियो । कार्यक्रममा चितवन प्रहरी प्रवक्ता श्रीराम भण्डारी, भरतपुर महानगरपालिका वडा नं. ५ का वडाअध्यक्ष जुद्धप्रसाद श्रेष्ठलगायतले मन्तव्य दिएका थिए ।
कार्यक्रम शुभकामना आदानप्रदान तथा भित्तेपात्रो विमोचनका संयोजक रेनु तामाङको सभापतित्वमा सम्पन्न भएको थियो भने सहसचिव तारा पण्डितले संचालन गरेका हुन् ।
सामुदायिक सेवा केन्द्र २०६३ सालमा स्थापना भएको हो । जिल्लामा हाल चार वटा सेवा केन्द्रहरु रहेका छन् ।
