चितवन / निर्माण व्यवसायी महासंघका केन्द्रीय अध्यक्ष रवि सिंहले निर्माण व्यवसायीहरुले अझैसम्म पनि भुक्तानी पाउन नसकेको बताए । निर्माण व्यवसायी संघ भरतपुर चितवनको ३०औं साधारणसभा एवं १६औं अधिवेशनका प्रमुख अतिथि समेत रहेका सिंहले शुक्रबार सो बताएका हुन् ।
कर्मचारीतन्त्रका कारण देश तहसनहस हुने पुगेको उनको भनाइ थियो । राजनीतिक पार्टीका नेताहरुले अझैपनि निर्माण व्यवसायीका समस्या बुझ्न नसकेको उनले बताए । राजनीतिक दलका नेताहरू सबैभन्दा पहिले सच्चिएर नीतिगत योजनाहरुलाई अगाडि बढाउनुपर्ने जिकिर गरे ।
- ADVERTISEMENT -
नेताहरुका कारण व्यवसायीहरु घर न घाटको भएको उल्लेख गर्दै निर्माण व्यवसायीका समस्याप्रति राज्य निकम्मा बनेको तर्क गरे । उनले तत्काल सरकारले निर्माण व्यवसायीहरुको भुक्तानी दिलाउन नसकेको खण्डमा सरकारको कडा प्रतिकारमा उत्रने चेतावनी समेत दिए ।
यसैबीच कालिका कन्स्ट्रक्सनका कार्यकारी निर्देशक निकोलस पाण्डेले निर्माण व्यवसायीहरु राज्यका कारण मात्र नभई कर्मचारीहरुको बेथितिका कारण पछाडि परेको बताए । भौतिक पूर्वाधारको क्षेत्रमा राज्यका कयौं संरचनामा निर्माण व्यवसायीहरुले गरेको ठूलो लगानी भुक्तानी समयमा नै नपाउँदा बालुवामा पानी हालेझैँ भएको उनको भनाइ थियो ।
