चितवन / अख्तियार दुरुपयोग अनुसन्धान आयोगले बीपी कोइराला मेमोरियल क्यान्सर अस्पताल चितवनमा कार्यरत लेखा अधिकृत अमृता कोइरालाविरुद्ध भ्रष्टाचार मुद्दा दायर गरेको छ । अख्तियारले एक लाख ५० हजार रुपैयाँ नगद र चार लाख ५० हजारको चेकसहित पक्राउ परेकी कोइरालाविरुद्ध बिहीवार विशेष अदालतमा मुद्दा दायर गरेको हो ।
कोइरालालाई औषधि आपूर्तिको बिल भुक्तानी दिए वापत सेवाग्राहीसँग घुस लिएको अख्तियारको आरोप छ । कोइरालाले आर्थिक वर्ष २०८०–८१ मा औषधि आपूर्ति गरे वापत नियम अनुसार पाउनुपर्ने रकमको भुक्तानीको बहानामा सेवाग्राहीसँग ६ लाख रुपैयाँ घुस मागेकी थिइन् ।
- ADVERTISEMENT -
त्यसबाहेक पनि उनले सेवाग्राहीसँग २०७९ जेठ २८ गते ४४ हजार, २०७९ कात्तिक ६ गते ६० हजार गरी जम्मा १ लाख ४ हजार रुपैयाँ घुस लिएको पाइएको अख्तियारको अभियोगपत्रमा उल्लेख छ ।
तर, कोइरालाले भने बयानका क्रममा उक्त रकम सेवाग्राहीसँग सापटी लिएको दाबी गरेकी थिइन् । यद्यपि उक्त रकम दुई वर्षभन्दा बढी समय भइसक्दासमेत फिर्ता नगरेको अभियोगपत्रमा उल्लेख छ ।
