– विना तामाङ
चितवन । कालिका नगरपालिकामा एघार वटा लायन्स क्लबले एकै थलोबाट विपन्न तथा गरिब परिवारलाई लक्षित गरी बुधबार निःशुल्क बृहत स्वास्थ्य शिविर सम्पन्न गरेका छन् । शिविरबाट ४ सय १८ जनाले स्वास्थ्यलाभ लिएको लायन्स क्लब अफ नारायणगढ दियालोका अध्यक्ष असिम हमालले जानकारी दिए ।
- ADVERTISEMENT -
अध्यक्ष हमालका अनुसार चितवन मेडिकल कलेज र नेपाल हेल्थ क्रप्स सिएमसी हस्पिटलको संयुक्त आयोजनामा सम्पन्न एक दिने शिविरलाई लायन्स क्लब अफ नारायणगढ दियालोको संयोजकत्वमा एघार वटा विभिन्न लायन्स क्लबहरुले सहजीकरण गरेका थिए ।
कार्यक्रमका प्रमुख अतिथि लायन्स इन्टरनेसनल डिष्ट्रिक्ट ३२५ आरका गभर्नर दीनानाथ न्यौपाने र कालिका नगरपालिकाका मेयर विनोद रेग्मीले संयुक्तरूपमा विभिन्न रोगका विशेषज्ञ डाक्टरहरुलाई औषधी प्रदान गरेर कार्यक्रम उद्घाटन गरिएको थियो ।
कार्यक्रममा विद्यालयमा दिवा खाजा वितरण, मधुमेह परीक्षण, डष्टविन वितरण, आँखा परीक्षण, स्थानीय युवाहरुलाई खेलकुद सामग्री वितरण, सिपीआर तालिम, दन्त शिविर, शिशु क्यान्सर सचेतनालगायतका विषयमा परामर्शसमेत दिइएको थियो ।
लायन्स क्लबहरुले एकैपटक बृहतरूपमा निःशुल्क स्वास्थ्य शिविर तथा लायन्स अन्तर्राष्ट्रिय ग्लोबल कजअन्तर्गतका आठ वटा कार्यक्रम सम्भवतः चितवनमै पहिलो पटक भएको हमालले बताए ।
कार्यक्रममा लायन्स क्लब इन्टरनेसनल डिष्ट्रिक्ट ३२५ आरका सेकेण्ड भाइस गभर्नर प्रभाकर पण्डित, पिडिजी राजकुमार श्रेष्ठ, श्री राष्ट्रिय आधारभूत विद्यालयका प्राचार्य बासुदेव आचार्य, कालिका नगरपालिका वडाध्यक्षसहितका जनप्रतिनिधिलगायत उपस्थित थिए ।
कालिका नगरपालिका वडा नं. २ मा स्थित श्री राष्ट्रिय आधारभूत विद्यालय पिपरियाको प्राङ्गणमा आयोजित कार्यक्रम लायन्स क्लब अफ भरतपुर इन्द्रेणीका उपाध्यक्ष डा लक्ष्मण पौडेलको अध्यक्षतामा सम्पन्न भएको हो ।
