– बबिलाल तामाङ
चितवन । भरतपुर महानगरपालिकाको आयोजनामा नारायणी नदी किनारमा विशेष सरसफाइ कार्यक्रम गरिएको छ । श्री राष्ट्रिय आधारभूत विद्यालयदेखि नारायणी नदीको पुलसम्म शनिबार सरसफाइ कार्यक्रम सम्पन्न गरिएको भरतपुर महानगरपालिका वडा नं. १ का वडाध्यक्ष केशव महर्जनले जानकारी दिए ।
- ADVERTISEMENT -
भरतपुर महानगरपालिकाका उपमेयर तथा प्रमुख अतिथि चित्रसेन अधिकारीले कार्यक्रमको उद्घाटन गरेका हुन् । कार्यक्रमको उद्घाटन पश्चात् बोल्दै प्रमुख अतिथि अधिकारीले नारायणी नदी किनारको सरसफाइमा सबैको हातेमालो आवश्यक रहेको बताए ।
कार्यक्रममा वडाध्यक्ष महर्जनले पछिल्लो समय पर्यटकीय दृष्टिकोणले नारायणी नदी किनार यस ठाउँको गौरव र शान भएकोले सरसफाइमा जिम्मेवार बन्नुपर्ने धारणा व्यक्त गरे । सभ्य समाजको लागि सार्वजनिक स्थलको सरसफाइ सबैको दायित्व रहेको बताउँदै निरन्तर सरसफाइमा ध्यान दिन उनको आग्रह थियो ।
उनले महिनामा एक पटक नारायणी नदी किनारमा बृहत सरसफाइ गर्ने योजनामा रहेको बताए । उनका अनुसार हाल नदी किनारमा दैनिक दुई जना स्वीपर परिचालित छन् । जुन सरसफाइका लागि अपर्याप्त नै छ । नदी किनारबाट दश ट्याक्टर फोहोर संकलन भएको उनले भने ।
नदी किनारको सरसफाइ कार्यक्रमलाई अभियानकै रुपमा लैजाने भरतपुर महानगरका उपनिर्देशक विसुराम कुँवरले बताए । भरतपुर महानगरपालिकालाई स्वच्छ र सफा राख्ने सवालमा तीव्र गतिमा लागि परेको उनको भनाइ थियो ।
कार्यक्रममा भरतपुर महानगरपालिका प्रमुख प्रशासकीय अधिकृत लक्ष्मीप्रसाद पौडेल, भरतपुर महानगर वडा नं. ४ का वडाध्यक्ष अर्पण पोखरेल, नेपाली सेना, नेपाल पुलिस, ट्राफिक प्रहरी, नगर प्रहरी, बालकुमारी कन्या माविका विद्यार्थी, नेपाल रेडक्रस सोसाइटी, विभिन्न टोल सुधार समिति, विभिन्न सामाजिक व्यक्तित्वहरु लगायतको सहभागिता रहेको थियो ।
यसअघि घुमौं भरतपुर २०२४ को पूर्वसन्ध्यामा नारायणी नदी किनारमा सरसफाइ भएको थियो ।
भरतपुर महानगरपालिका उपनिर्देशक विस्सुराम कुँवरसँग नारायणी नदी किनारको सरसफाइ बारे छोटो कुराकानी :
