काठमाडौं / नेपाली कांग्रेसका महामन्त्री गगनकुमार थापाले २०४६ सालपछि पार्टीबाट सत्तामा पुगेका सबै नेताको सम्पत्ति छानबिन गर्न पूर्वन्यायाधीशको संयोजकत्वमा शक्तिशाली आयोग गठन गर्नुपर्ने प्रस्ताव राखेका छन् ।
काठमाडौंमा आईतबार आयोजित ‘जेन–जी पुस्ता र लोकतान्त्रिक विचार’ विषयक अन्तरक्रिया कार्यक्रममा बोल्दै थापाले पार्टीको बैठकबाट नै उक्त प्रस्ताव पारित गर्नुपर्ने धारणा राखेका हुन् ।
- ADVERTISEMENT -
‘२०४६ सालको आन्दोलनपछि कांग्रेस सत्तामा आयो । त्यसयता वडादेखि केन्द्रसम्म जस–जसले जिम्मेवारी पाएका छन्, सबैको सम्पत्ति छानबिन गरौँ,’ थापाले भने, ‘देशले विश्वास गर्ने, निष्पक्ष पूर्वन्यायाधीशको संयोजकत्वमा आयोग बनाऔँ । त्यो व्यक्ति न कांग्रेस होस्, न एमाले, न माओवादी ।’
महामन्त्री थापाका अनुसार, यस्तो आयोगलाई २०४६ सालपछि सत्तामा गएका सबै नेताको सम्पत्ति छानबिन गर्ने अधिकार दिनुपर्ने छ । ‘छानबिनका क्रममा जतिसुकै शक्तिशाली व्यक्ति परे पनि, आयोगको प्रतिवेदनलाई पार्टीले स्वीकार्ने आँट गर्नुपर्छ,’ उनले भने ।
- ADVERTISEMENT -
नयाँ पुस्ता (जेन–जी) को विश्वास जित्न भ्रष्टाचारविरुद्ध स्पष्ट मापदण्ड र दृढ प्रतिबद्धता आवश्यक रहेको बताउँदै थापाले जोड दिए, ‘न्यायको पक्षमा उभिन सक्ने र परिवारको लागि होइन, देशका लागि लड्ने नेतामात्र अब स्वीकारिन्छन् ।’
उनले विगतमा नेताहरु देशका लागि लडे पनि अहिलेका युवाहरू ‘परिवारका लागि कमाउने नेता’ स्वीकार नगर्ने स्पष्ट संकेतसमेत दिए । ‘यो पुस्ताको गुनासो सम्बोधन नगरी अब हामी उनीहरूको बीचमा जान सक्दैनौं,’ थापाले भने, ‘यो नेपाली कांग्रेसका लागि सबैभन्दा ठूलो चुनौती हो ।’
