गैँडाकोट / गैँडाकोटका ४० वर्षीय कमानसिंह तामाङ करिब एक महिनादेखि बिरामी छन् । कलेजोमा समस्या आएपछि उपचार गरिरहेका तामाङको उपचार आर्थिक अभावका कारण प्रभावित बनेको छ ।
तसर्थ उनका परिवारले सहयोगको याचना गरेको छ । कलेजो नै प्रत्यारोपण गर्नपर्ने देखिएपछि परिवारको आर्थिक हैसियतले नभ्याउने हुँदा सार्वजनिकरुपमै सहयोगको याचना गरेको कमानसिंहकी श्रीमती रेखा तामाङले जानकारी दिइन् ।
- ADVERTISEMENT -
परिवारले कमानसिंहको उपचारको लागि हालसम्म कम्तिमा पनि १५ लाख रुपैयाँभन्दा बढी खर्च गरिसकेको जनाएको छ । ‘अब यसभन्दा माथि उपचार खर्च जुटाउन सक्ने अवस्था रहेन र सबैसँग सहयोगको लागि याचना गरेकी हुँ,’ रेखा भन्छिन्, ‘सबैको सानो सहयोगले मेरा श्रीमानले उपचार पाउनेमा म विश्वस्त छु ।’ अस्पतालले नै कलेजो प्रत्यारोपण गर्नुपर्ने बताएपछि रेखाको मनमा शान्ति छाएको छैन ।
अस्पतालले दिएको जानकारीअनुसार कलेजो प्रत्यारोपणको लागि कम्तिमा पनि ४० लाख रुपैयाँ जुटाउनुपर्ने बाध्यता रेखाको काँधमा आइपरेको छ । भरतपुरको चितवन मेडिकल कलेजमा १८ दिन बसेपछि भक्तपुर पुगेका कमानसिंहको उपचार अहिले भने भक्तपुरस्थित अङ्ग प्रत्यारोपण केन्द्रमा चलिरहेको छ । तर, उपचारमा आर्थिक सङ्कट आइपरेपछि सहयोगी व्यक्ति तथा संघसंस्थाको आशा गरेर बसिरहेकी छन्, रेखा ।
- ADVERTISEMENT -
उनले आफ्ना श्रीमानको जीवन बचाइदिनको लागि रकम सङ्कलन गरिदिनसमेत अनुरोध गरेकी छन् । परिवारको आर्थिक अवस्था ज्यादै कमजोर भएको हुँदा गैँडाकोट नगरपालिका वडा नं. १७ ले समय कमानसिंहको परिवारलाई सबैले सक्दो सहयोग गरेर उपचारमा सहज वातावरण सिर्जना गरिदिन आग्रह गरेको छ ।
कमानसिंहको उपचारमा सहयोग गर्न चाहने व्यक्ति तथा संस्थाहरुका लागि रेखा तामाङको नाममा एनआइसी एसिया बैंकको खाता नम्बर ०७७५७५३३७१९७३००१ मा रकम जम्मा गरिदिन अपिल गरेकी छन् ।
