चितवन / लायन्स क्लब अन्तर्राष्ट्रिय, डिष्ट्रिक ३२५ आर, क्लस्टर नं. ३ को आयोजनामा तथा होटल व्यवसायी संघ चितवनको सहकार्यमा शुक्रबार भरतपुरको चौविसकोठीमा बृहत् रक्तदान कार्यक्रम गरिएको छ ।
मानवताको सेवा र सामाजिक उत्तरदायित्वप्रति समर्पित “रक्तदान–जीवनदान” अभियानअन्तर्गत आयोजित उक्त कार्यक्रममा ३०७ जनाले स्वेच्छिक रूपमा रक्तदान गरेका हुन् ।
- ADVERTISEMENT -
मेडिकल सिटीका रूपमा परिचित चितवनमा रगतको अभाव निरन्तर देखिँदै आएको अवस्थालाई मध्यनजर गर्दै यस कार्यक्रम आयोजना गरिएको आयोजकले जनाएको छ ।
रगतको अभावमा देशका विभिन्न स्थानबाट उपचारका लागि चितवन आउने बिरामीहरूले रगत नपाएर उपचारमा समस्या भोग्दै आएका छन् । यस्तो संवेदनशील अवस्थालाई सम्बोधन गर्ने उद्देश्यले यो रक्तदान कार्यक्रम आयोजना गरिएको कार्यक्रम संयोजक एकराज बुर्लाकोटीले बताए ।
- ADVERTISEMENT -
डिष्ट्रिक गर्भनर लायन नवराज सापकोटा प्रमुख अतिथि रहेको कार्यक्रमको सभापतित्व क्लस्टर नं. ३ का अध्यक्ष अजामिन ढकालले गरेका थिए । सो कार्यक्रमका प्रथम भाइस डिष्ट्रिक गर्भनर लायन प्रभाकर पण्डित, द्वितीय भाइस डिष्ट्रिक गर्भनर लायन दिपेन्द्रप्रसाद खतिवडा, पूर्व डिष्ट्रिक गर्भनरहरू, साथै लायन्स तथा लियो सदस्यहरू, सामाजिक व्यक्तित्वहरू र शुभेच्छुकहरूको उल्लेखनीय उपस्थिति रहेको थियो ।
लायन्स क्लब अन्तर्राष्ट्रियले विगतदेखि नै शिक्षा, स्वास्थ्य, अन्धोपन निवारण, मधुमेह सचेतना, वातावरण संरक्षण, भोकमरी निवारण, स्वास्थ्य शिविर, विपद् व्यवस्थापनजस्ता क्षेत्रमा निरन्तर र सक्रिय योगदान गर्दै आईरहेको छ ।
यस्ता बृहत् रक्तदान कार्यक्रममा भएको उल्लेखनीय सहभागिताले चितवनमा स्वेच्छिक रक्तदानप्रति जनचेतना र सामाजिक उत्तरदायित्वबोध बढ्दै गएको लायनहरुले बिश्वास लिएका छन् ।
