काठमाडौं / आईसीसी महिला टी–२० विश्वकप ग्लोबल छनोट अन्तर्गत समूह चरणको अन्तिम र निर्णायक खेलमा आज (आइतबार) नेपालले बलियो प्रतिद्वन्द्वी स्कटल्यान्डको सामना गर्दैछ । खेल कीर्तिपुरस्थित त्रिवि क्रिकेट मैदानमा बिहान ९ बजे सुरु हुनेछ ।
घरेलु मैदानमा जारी प्रतियोगितामा नेपालले सोचेअनुरूपको नतिजा निकाल्न सकेको छैन । पहिलो खेलमा थाइल्यान्ड र दोस्रो खेलमा नेदरल्यान्ड्ससँग पराजित भएपछि नेपालको सुपर सिक्स यात्रा कठिन मोडमा पुगेको छ । तेस्रो खेलमा जिम्बावेलाई हराएर केही राहत महसुस गरेको नेपालले आज स्कटल्यान्डलाई हराउनैपर्ने बाध्यात्मक अवस्था छ ।
- ADVERTISEMENT -
तर, जितले मात्र नेपालको यात्रा सुनिश्चित हुनेछैन । सुपर सिक्समा प्रवेश गर्नका लागि नेपालले स्कटल्यान्डलाई फराकिलो अन्तरले पराजित गर्नुपर्नेछ भने आजै हुने थाइल्यान्ड र नेदरल्यान्ड्सबीचको खेलको नतिजा पनि कुर्नुपर्ने हुन्छ । अर्थात्, आजको खेल नेपालको आफ्नै प्रदर्शन र भाग्य दुवैमा निर्भर रहनेछ ।
कागजी रूपमा हेर्दा स्कटल्यान्ड नेपालभन्दा निकै बलियो टोली हो । आईसीसी टी(२० आई वरीयतामा स्कटल्यान्ड ११औं स्थानमा छ भने नेपाल २१औं स्थानमा रहेको छ । स्कटल्यान्डले सन् २०२४ मा यूएईमा भएको महिला टी–२० विश्वकप खेलिसकेको अनुभव सँगालेको छ । सोही विश्वकपको आधारमा उनीहरूले सोझै ग्लोबल छनोटमा स्थान बनाएका हुन् ।
यद्यपि, अन्तर्राष्ट्रिय टी–२० खेलमा नेपाल र स्कटल्यान्डको यो पहिलो औपचारिक भेट हो । प्रतियोगिता अघि भएको अभ्यास खेलमा भने नेपाल स्कटल्यान्डसँग २७ रनले पराजित भएको थियो ।
नेपाली टोली ः इन्दु बर्मा (कप्तान), पूजा महतो, सम्झना खड्का, बिन्दु रावल, रुबिना क्षेत्री, कविता कुँवर, रिया शर्मा, सोमु विष्ट, राजमती ऐरी, रोमा थापा, कविता जोशी, सीता राना मगर, काजल श्रेष्ठ, मनिषा उपाध्याय र रचना चौधरी ।
