एजेन्सी । ओमानको खाडीमा अमेरिकी सेनाले इरानी झण्डावाहक एक व्यापारिक तेल ट्याङ्करलाई नियन्त्रणमा लिई खानतलासी गरेको छ । अमेरिकी सेन्ट्रल कमान्ड (सेन्ट्रकम) ले बुधवार सो जानकारी दिएको हो ।
सेन्ट्रकमले सामाजिक सञ्जाल एक्समार्फत जारी गरेको विज्ञप्तिअनुसार, अमेरिकी ३१ औँ मरिन एक्सपिडिसनरी युनिटका मरिन कमान्डोहरूले एमटी सेलेस्टियल सी नामक तेल ट्याङ्करमा बोर्डिङ गरी खानतलासी गरेका हुन् । उक्त जहाजले अमेरिकी नाकाबन्दीको उल्लंघन गर्दै इरानी बन्दरगाहतर्फ जान खोजेको आशंका गरिएको थियो ।
- ADVERTISEMENT -
अमेरिकी सेनाले जहाजको खानतलासी गरेपछि चालक दललाई मार्ग परिवर्तन गर्न निर्देशन दिँदै सो ट्याङ्करलाई मुक्त गरिदिएको छ । सेन्ट्रकमले नाकाबन्दीलाई पूर्ण रूपमा कार्यान्वयन गर्ने क्रममा हालसम्म ९१ वटा व्यापारिक जहाजहरूको मार्ग परिवर्तन गराइएकोसमेत उल्लेख गरेको छ ।
यसअघि अमेरिकी राष्ट्रपति डोनाल्ड ट्रम्पले ‘प्रोजेक्ट फ्रिडम’ स्थगित गरे पनि जारी युद्धविरामका क्रममा इरानविरुद्धको वृहत्तर नाकाबन्दी पूर्ण रूपमा प्रभावकारी रहने बताएका थिए ।
- ADVERTISEMENT -
यता इरानले भने अमेरिकी नौसैनिक कारबाहीलाई अन्तर्राष्ट्रिय कानुन विपरित र अवैध भन्दै निरन्तर निन्दा गर्दै आएको छ । विश्वको ऊर्जा आपूर्तिका लागि रणनीतिक रूपमा महत्वपूर्ण मानिने ओमानको खाडीले अरब सागर र हर्मज जलडमरूमध्यलाई जोड्ने गर्दछ ।
