काठमाडौं / फिफा विश्वकप २०२६ मा चार पटकको विश्व विजेता जर्मनी नकआउट चरणबाटै बाहिरिएको छ । अन्तिम ३२ को चरणमा पाराग्वेसँग पराजित हुँदै जर्मनी प्रतियोगिताबाट बाहिरिएको हो ।
मंगलबार बिहान सम्पन्न खेलमा जर्मनी पहिलो हाफमै १–० ले पछि परेको थियो । पाराग्वेका जुलियो एन्सिसोले ४२औँ मिनेटमा हेडमार्फत गोल गर्दै टोलीलाई अग्रता दिलाएका थिए। पहिलो हाफमा चार पटकका विश्व विजेताको प्रदर्शन निकै फितलो देखिएको थियो ।
- ADVERTISEMENT -
दोस्रो हाफ सुरु भएपछि जर्मनीले खेलमा फर्कने प्रयास गर्यो । ५३औँ मिनेटमा काइ हाभर्ट्जले गोल गर्दै खेल १–१ को बराबरीमा ल्याए । त्यसपछि जर्मनीले कर्नरबाट अर्को गोल गरे पनि भीएआर समीक्षा पछि पाराग्वेका गोलकिपरमाथि फाउल भएको ठहर गर्दै गोल रद्द गरिएको थियो ।
निर्धारित समय र अतिरिक्त समयमा थप गोल हुन नसकेपछि खेलको निर्णय पेनाल्टी सुटआउटबाट गरिएको थियो । सुटआउटमा जर्मनीका लागि पहिलो पेनाल्टी हानेका हाभर्ट्जले नै अवसर गुमाए ।
- ADVERTISEMENT -
जर्मनीले कुल तीन पेनाल्टी खेर फालेको थियो भने पाराग्वेले दुई पेनाल्टी चुकाए पनि अन्ततः ४–३ ले जित निकाल्दै अन्तिम १६ मा स्थान सुरक्षित गर्यो ।
