भरतपुर / तमू प्ये ल्हु संघ चितवनले शनिबार चितवनका १३ जना विद्यार्थीलाई छात्रवृत्ति प्रदान गरेको छ । ‘तमू सांस्कृतिक प्रतिष्ठान नेपाल’मार्फत प्ये ल्हु संघले चितवनका विद्यार्थीलाई छात्रवृत्ति प्रदान गरेको हो । २०५८ सालमा पोखराबाट सुरु भएको छात्रवृत्ति चितवनमा भने विगत सात वर्षअघिदेखि लागू गरिएको तमू प्ये ल्हु संघ चितवनका अध्यक्ष विक्रम च्हम्रु तमूले जानकारी दिए ।
उनका अनुसार कक्षा ९ देखि १२ सम्मका तमू विद्यार्थीको शैक्षिक उन्नयनको लागि प्रतिष्ठानले हरेक वर्ष छात्रवृत्ति प्रदान गर्दै आइरहेको छ । सोहीअनुसार शनिबार नेपाल आदिवासी जनजाति महासंघ (नेफिन) चितवनका अध्यक्ष सागर कुमालको विशेष उपस्थितिमा अभिभावकको साथमा उपस्थित गराएर विद्यार्थीलाई छात्रवृत्ति प्रदान गरेको हो ।
- ADVERTISEMENT -
नेफिन चितवनका अध्यक्ष सागर कुमालले आदिवासी जनजाति समुदायलाई शैक्षिक विकासमा माथिल्लो तहसम्म उकास्नको लागि तमू सांस्कृतिक प्रतिष्ठानजस्ता संघसंस्थाको महत्त्वपूर्ण योगदान रहने बताए । जिल्ला तहबाट पनि यस्ता कार्यक्रम गर्न आवश्यक रहेको उनले बताए । ‘विद्यार्थीहरुले पनि आफ्नो शैक्षिक भविष्यको लागि संघसंस्थाले दिएको साथ र सहयोगलाई बिर्सन हुँदैन,’ उनले भने, ‘भोलि आफू लक्ष्यमा पुगिसकेपछि नयाँ पुस्तालाई पनि सहयोग गर्ने भावनाको विकास गराउन जरुरी छ ।’
कार्यक्रममा पछिल्लो समयको शैक्षिक अवस्था, शिक्षा क्षेत्रमा तमू समुदायको अवस्था, उपस्थिति र सम्भावनालगायतका विषयमा प्ये ल्हु संघका दिग्गज व्यक्तिहरुले पनि धारणा राखेका थिए ।
- ADVERTISEMENT -
