चितवन / भरतपुर महानगरपालिका वडा नं. १९, रामपुर बजारमा गुम्बाहरुको छाता संगठन महाबौद्ध संघ–नेपालले बृहत् रक्तदान कार्यक्रम गर्ने भएको छ ।
चितवनमा देखिएको रगत अभावलाई न्यूनीकरण गर्न तथा ‘मानवताका लागि बौद्ध शिक्षा’ भन्ने मूल नारासहित यही साउन १ गते संक्रान्तिको दिन पारेर उक्त कार्यक्रम हुने संघका अध्यक्ष मेकना तामाङले जानकारी दिए ।
- ADVERTISEMENT -
अध्यक्ष तामाङका अनुसार सोही अवसरमा भरतपुर महानगरपालिका कार्यवाहक नगरप्रमुख चित्रसेन अधिकारीले संघको नयाँ कार्यालयको पनि उद्घाटन गर्नेछ ।
रक्तदान कार्यक्रममा सफल बनाउन ३० भन्दा बढी सामाजिक, धार्मिक तथा सामुदायिक संघ–संस्थालाई औपचारिक रूपमा पत्राचार गरिएको छ भने सम्पूर्ण जिल्लावासीलाई सहभागिताका लागि उनले आग्रह समेत गरेको छ ।
बृहत् रक्तदान कार्यक्रममार्फत करिब १५० पिन्ट रगत संकलन गर्ने लक्ष्य राखिएको छ । नेपाल रेडक्रस सोसाइटी, चितवन शाखाको समन्वयमा कार्यक्रम सञ्चालन हुन लागेको हो ।
कार्यक्रममा भरतपुर महानगरपालिका कावा उपप्रमुख चित्रसेन अधिकारी प्रमुख अतिथि, भरतपुर महानगरपालिका–१९ का वडा अध्यक्ष प्रकाश तामाङ विशिष्ट अतिथि लगायतका रहने छन् ।
कार्यक्रमले बौद्ध शिक्षा, सामाजिक सेवा र मानवीय सहयोगलाई प्रवर्द्धन गर्ने उद्देश्य लिएको महाबौद्ध संघ–नेपालले जनाएको छ ।
संघले यसअघि पनि विभिन्न कार्यक्रम गर्दै आएको छ भने बौद्ध दर्शन तथा शिक्षालाई जोड दिँदै आएको छ ।
