काठमाडौं । विज्ञान, प्रविधि तथा नवप्रवर्तनमन्त्री महावीर पुनले अति महत्वपूर्ण सार्वजनिक महत्वका विषयबाहेक आगामी एक वर्षसम्म सञ्चारमाध्यमलाई अन्तर्वार्ता नदिने घोषणा गरेका छन् ।
ट्राफिक जरिबानासम्बन्धी आफ्नो अभिव्यक्तिलाई लिएर विवाद चुलिएपछि मन्त्री पुनले शनिबार सामाजिक सञ्जाल ‘एक्स’मार्फत यस्तो घोषणा गरेका हुन् ।
- ADVERTISEMENT -
उनले ‘आजदेखि कुनै पनि ठूला–साना युट्युबर, सामाजिक सञ्जाल तथा पत्रकारलाई अति महत्वपूर्ण सार्वजनिक महत्वका विषयबाहेक एक शब्द पनि अन्तर्वार्ता नदिने’ बताएका छन् ।
पुनले केही दिनअघि ट्राफिक जरिबानाका विषयमा आफूलाई जानकारी नभएको बताउँदासमेत युट्युबरहरूले पटक–पटक सोधेको दाबी गरेका छन् । ‘मैले ट्राफिक नियम अटेर गर्नेलाई जरिबाना गर्नुपर्छ भनेको हो । ५० हजार रुपैयाँ जरिबानाको कुरा उनीहरूले नै निकालेका हुन्,’ उनले उल्लेख गरेका छन् ।
- ADVERTISEMENT -
यसअघि अन्तर्वार्ताका क्रममा ट्राफिक नियम उल्लंघन गर्नेलाई ५० हजार रुपैयाँसम्म जरिबाना गर्नुपर्ने आशयको अभिव्यक्ति दिएपछि मन्त्री पुनको व्यापक आलोचना भएको थियो ।
विवाद बढेपछि उनले उक्त अभिव्यक्ति फिर्ता लिँदै सार्वजनिक रूपमा माफीसमेत मागेका छन् । ‘मैले बोलेको कुरा फिर्ता लिन्छु । अचानक त्यसो बोल्दा अज्ञानवश कसैलाई चोट पुगेको भए क्षमा चाहन्छु,’ उनले लेखेका छन् ।
साथै, उनले ट्राफिक नियम पालना गर्न सबैलाई आग्रह गर्दै नियम उल्लंघन गर्नेहरूले आफ्नो व्यवहारबारे आत्मसमीक्षा गर्नुपर्ने बताएका छन् ।
