चितवन / राप्ती नगरपालिका–१ डिपाट बस्तीमा बाघको आक्रमणबाट एक स्थानीय घाइते भएका छन् । बाघले गोठमा बाँधेर राखेको गाईलाई समेत आक्रमण गरी घाइते बनाएको छ ।
चितवन प्रहरीका अनुसार आइतबार बिहान करिब पौने सात बजे बस्तीमा आएको बाघले राप्ती नगरपालिका–१ निवासी ६० वर्षीय ठाकुर अधिकारीलाई आक्रमण गरेको हो । बाघको आक्रमणबाट घाइते अधिकारीको भरतपुर सरकारी अस्पतालमा उपचार भइरहेको छ प्रहरीले जनाएको छ ।
- ADVERTISEMENT -
यसै क्रममा सोही स्थानकी दिलकुमारी तामाङको गोठमा बाँधिएको जर्सी गाईलाई समेत बाघले आक्रमण गरेको थियो ।
बाघलाई नियन्त्रणमा लिन चितवन राष्ट्रिय निकुञ्जबाट हात्तीसहितको टोली घटनास्थलमा पुगेको थियो । टोलीले बिहान करिब १०ः३० बजे बाघलाई नियन्त्रणमा लिएको जनाइएको छ ।
घटनापछि स्थानीयवासीमा त्रास फैलिएको थियो भने बाघ नियन्त्रणमा लिएपछि सम्भावित थप क्षति टरेको छ ।
