चितवन / हरितालिका तीजको अवसर पारेर देवघाटस्थित रोटरी करुणालय वृद्धाश्रममा रहेका ज्येष्ठ नागरिकहरूलाई लक्षित गर्दै तीज विशेष दर खाने कार्यक्रम आयोजना गरिएको छ ।
स्पाउज क्लब अफ आरसी चितवनको आयोजनामा भएको कार्यक्रममा वृद्धाश्रमका ज्येष्ठ नागरिकहरूले तीजको खुशी साटासाट गर्दै सोमबार आत्मीय वातावरणमा दर खाएका हुन् ।
- ADVERTISEMENT -
सामान्यतः परिवार र आफन्तसँग बसेर मनाइने तीजको अवसरमा वृद्धाश्रममा रहेका ज्येष्ठ नागरिकहरूलाई पनि पर्वको अनुभूति दिलाउने उद्देश्यले कार्यक्रम आयोजना गरिएको स्पाउजका अध्यक्ष जानकारी शर्माले जानकारी दिइन् । कार्यक्रममा ज्येष्ठ नागरिकहरूसँगै बसेर तीजको शुभकामना आदानप्रदान गर्नुका साथै उनीहरूको सुख–दुःखमा साथ र आत्मीयता व्यक्त गरिएको उनको भनाइ थियो ।
कार्यक्रममा रोटरी क्लब अफ चितवनका अध्यक्ष तथा प्रमुख अतिथि गेहेन्द्रमान श्रेष्ठले ज्येष्ठ नागरिकहरूको सम्मान र खुशीका लागि स्पाउज क्लबले आयोजना गरेको कार्यक्रम प्रशंसनीय रहेको बताए । सामाजिक तथा मानवीय गतिविधिले वृद्धाश्रममा रहेका ज्येष्ठ नागरिकको जीवनमा सकारात्मक ऊर्जा थप्नुका साथै समुदायमा समेत सकारात्मक सन्देश प्रवाह गर्ने उनको भनाइ थियो ।
- ADVERTISEMENT -
कार्यक्रम स्पाउज क्लबकी अध्यक्ष जानकी शर्माको सभापतित्वमा सम्पन्न भएको थियो भने सञ्चालन क्लबकी सचिव बबिता घिमिरेले गरिन् ।
रोटरी करुणालय वृद्धाश्रमका अध्यक्ष एवं रोटरी क्लब अफ चितवनका पूर्व अध्यक्ष उत्तमलाल चुके, वृद्धाश्रमका बाह्य सेवाग्राही, स्पाउज क्लबका सदस्य, रोटरियन तथा कर्मचारीहरूको समेत उल्लेख्य सहभागिता रहेको थियो ।
कार्यक्रममा वृद्धाश्रमका ३५ जना आवासीय ज्येष्ठ नागरिक सहभागी भएका थिए । उनीहरूका लागि तीज विशेष साकाहारी भोजनका विभिन्न परिकारको व्यवस्था गरिएको थियो ।
