सोह्र श्राद्ध आजदेखि सुरु, पितृको सम्झनामा तर्पण र श्राद्ध

काठमाडौं / आज आश्विन कृष्ण प्रतिपदा अर्थात चन्द्रमास पात्रोअनुसार आश्विन कृष्ण पक्षलाई पितृपक्ष अर्थात् सोह्र श्राद्ध भनिन्छ। यस अवधिमा हिन्दू धर्मावलम्बीहरूले आफ्ना दिवंगत पितृको सम्झनामा तर्पण तथा श्राद्ध गर्ने परम्परा छ ।

आमाबुवा तथा पितृजनको निधन भएका व्यक्तिहरूले पितृपक्षभरि नियममा रही पितृको मृत्युतिथिका दिन श्राद्ध गर्ने गर्छन्। आफ्नो पितृको तिथिमा श्राद्ध गर्न नसके अन्तिम दिन अर्थात् औँसीमा श्राद्ध गर्ने परम्परा पनि छ ।

- ADVERTISEMENT -

चन्द्रमासको एक पक्षमा १५ वटा तिथि हुने भए पनि भाद्र शुक्ल पूर्णिमादेखि आश्विन औँसीसम्म पर्ने १६ वटा तिथिमा श्राद्ध गरिने भएकाले यसलाई सोह्र श्राद्ध भनिएको हो ।

हिन्दू वैदिक तथा पौराणिक मान्यताअनुसार आश्विन कृष्ण पक्ष पितृहरूलाई तृप्त तुल्याउने समय भएकाले यसलाई पितृपक्ष भनिन्छ ।

- ADVERTISEMENT -

यस अवधिमा पितृको सम्झनामा दैनिक जल तर्पण गर्दै मृत्युतिथिका दिन श्राद्ध गरिन्छ। सोह्र श्राद्धमा विधिपूर्वक श्राद्ध तथा तर्पण गरेमा पितृहरूको आत्माले शान्ति प्राप्त गर्ने धार्मिक विश्वास छ ।